O‘zbekiston Mudofaa vazirligi axborot va ommaviy kommunikatsiyalar departamenti boshlig‘i podpolkovnik Bahrom Zulfiqorov rahbarligidagi harbiy delegatsiya Xitoyga xizmat safarida bo‘ldi. Bu haqda Mudofaa vazirligi axborot va ommaviy kommunikatsiyalar departamenti “Daryo”ga ma’lum qildi.
Safardan ko‘zlangan asosiy maqsad dunyoning rivojlangan davlatidagi harbiy matbuot faoliyatini o‘rganish va o‘zaro tajriba almashish bo‘ldi.
Safar davomida delegatsiya a’zolari Mudofaa vazirligi xalqaro harbiy hamkorlik kanselyariyasi boshlig‘i general-mayor Tsi Govey, mudofaa vazirining matbuot kotibi – vazirlik axborot departamenti boshlig‘i katta polkovnik U Tsyan bilan uchrashuv o‘tkazdi.
Xitoy Mudofaa vazirligida o‘tgan tadbirlar davomida ikki mamlakat mudofaa idoralari orasidagi harbiy hamkorlikning bugungi holati, shuningdek, axborot sohasida amalga oshirilayotgan ishlar, ularning o‘ziga xos, o‘xshash va farqli jihatlari, media mahsulotlarini tayyorlash jarayonlari haqida fikr almashildi. Shuningdek, axborot departamentlari o‘rtasida hamkorlik aloqalarini o‘rnatishga oid istiqbolli yo‘nalishlar muhokama qilindi.
O‘zbekiston harbiy delegatsiyasi Xitoy harbiy matbuoti faoliyati bilan yaxshiroq tanishish maqsadida Xitoy Xalq-ozodlik armiyasi ommaviy axborot vositalari markazining teleradio eshittirishlari bo‘limida bo‘ldi. Mehmonlarga markazning texnik imkoniyatlari namoyish etildi.
O‘zbekistonlik harbiylar Xitoy Kompartiyasi markaziy qo‘mitasining nashri hisoblanuvchi “Jenmin jibao” gazetasi tahririyatiga ham taklif etildi. Tahririyatning siyosat bo‘limi boshlig‘i va harbiy-vatanparvarlik yo‘nalishiga ixtisoslashgan muxbirlar bilan suhbatda materiallarni bosma va elektron ko‘rinishdagi gazetaga chop etish jarayonlari haqidagi ma’lumotlar yetkazildi.
Xitoy xalq universitetining jurnalistika fakultetiga tashrif esa harbiy matbuot sohasida kadrlar tayyorlash bo‘yicha tajriba almashish uchun muhim ahamiyat kasb etdi.
Izoh (0)