Қашқадарёдаги 8 та туман ҳокимларининг матбуот котиблари вилоят раҳбари Зоир Мирзаев танқидига учради. Бу ҳақда вилоят ҳокимлиги ахборот хизмати хабар бермоқда.
Айтилишича, 6 декабрь куни вилоят ҳокими Зоир Мирзаев раҳбарлигида «Ёшлар — келажагимиз» жамғармаси фаолиятига доир танқидий руҳдаги йиғилиш бўлиб ўтган.
Вилоят ҳокими ахборот хизмати раҳбарларини ОАВлар билан самарали ҳамкорликни йўлга қўймаганликда айблаган.
— Йиғилишда туман ва шаҳар ҳокимликлари ҳамда ташкилот раҳбарларининг матбуот котиблари — ахборот сиёсати масалалари бўйича маслаҳатчилари фаолияти ҳам танқид остига олинди. Чироқчи, Муборак, Миришкор, Қамаши, Китоб, Шаҳрисабз, Ғузор ва Қарши туман ҳокимларининг матбуот котиблари ҳудудда соҳалар бўйича амалга оширилаётган ишларни ёритишда ОАВлар билан самарали ҳамкорликни йўлга қўймаган, — дейилади ахборот хизмати хабарида.
Таъкидланишича, Конституция қабул қилинган кун муносабати билан ўтказиладиган тадбир ва лойиҳалар ҳокимлик ва ташкилотларнинг матбуот котиблари томонидан аъло даражада ёритилмаган ёки масъуллар томонидан тадбирлар ташкил этилмаган.
— Президентимиз Шавкат Мирзиёев ташаббуси билан декабрь ойининг иккинчи якшанбаси Ўзбекистон Республикаси қишлоқ хўжалиги ходимлари куни сифатида белгиланган. Аммо байрамона руҳни ҳали ҳам сезмадик. Раҳбарнинг маслаҳатчиси, ўринбосари мақоми берилган матбуот котиблари ҳар бир ҳолатни олдиндан раҳбарга етказиб туриши керак эмасми?, — дея ҳоким гапидан иқтибос келтирилган вилоят ҳокимлиги ахборот хизмати.
Зоир Мирзаев йиғилиш якунида ҳокимлар ва вилоят ташкилоти раҳбарларига матбуот хизмати раҳбарлари фаолиятини вилоят Ахборот ва оммавий коммуникациялар бошқармаси билан келишган ҳолда ўрганиб, хулоса бериш вазифасини топширган.
Маълум бўлишича, вилоятда туман ва шаҳар ҳокимликлари, мавжуд бошқарма бошлиқларининг ўринбосарларига тенглаштирилаётган матбуот котибларига ойлик иш ҳақи тайинлаш ва хизмат кўрсатиш борасида ҳалигача Президент талаби бажарилмаган.
— Матбуот котибларига ўринбосар мақоми фақат тилда, амалда эса ҳеч қандай ўзгариш сезилмаяпти, — дейди матбуот котибларидан бири.
Изоҳ (0)