Яккабоғ туманидаги 66-мактаб ўқитувчилари мактабда соғлом муҳит йўқлиги, физика фани ўқитувчиси математика фанидан, жисмоний тарбия ўқитувчиси эса рус тилидан дарс беришини айтиб, халқ таълими мутасаддиларини дарс соатларини сотишда айбламоқда. Бу ҳақда «Дарё»га мурожаат қилган ўқитувчилардан бири Маҳфуза Раҳимова бунда туман халқ таълими мудири Узоқ Нурматовнинг «қўли борлиги»ни таъкидламоқда.
— Туман халқ таълими бўлими мудири дарс соатини сотади, — дейди Маҳфуза Раҳимова.
Дарс соати сотилишидан шубҳаланаётган ўқитувчининг айтишича, мудир ишдан ташқари пайт — оқшомда мактабга келиб синф раҳбарликка даъвогар ўқитувчиларга савол берган ва фақат ўзи қўллаб-қувватлаган ўқитувчидан жавоб эшитган. Маҳфуза Раҳимова жавоб беришга ҳаракат қилиб, қўл кўтарса ҳам эътибор бермаган. Ва натижада ўша ўзи қўллаган ўқитувчига синф раҳбарликни топшириб кетган.
— 7 та метод бирлашма бор, ўшалар имтиҳон қилиши керак бўлган ишни мудирнинг ўзи қиляпти, — дейди Маҳфуза Раҳимова. — Нега? Чунки бу ерда манфаатдорлик бор. Мудир директорлар билан келишиб, ўзининг одамларига дарс соатлари-ю синф раҳбарликни топшириб кетяпти.
«Дарё» мухбири билан суҳбаташган 66-мактаб ўқитувчиларининг маълумот беришича, мудирдан ўрнак олган мактаб раҳбари ҳам таниш-билишчилик қилиб, физика фани мутахассислигига эга бўлган ўқитувчига математика дарсларини топшириб қўйган. Жисмоний тарбия ўқитувчиси эса рус тилидан дарс беради.
— Физика фани ўқитувчиси 3 йил давомида математикадан дарс бериб келди, — дейди ўқитувчилар. — Мутахассис бўлмаса ҳам дарс соатлари ўша ўқитувчига топшириб қўйилди. Мактабимизда коррупция илдиз отган.
Мактаб директорининг тан олишича, ҳақиқатан ҳам физика мутахассиси мактабда математика фанидан дарс бериб келган. Аммо яқинда ўқитувчига берилган дарс соатлари олиб қўйилган.
— 13 соат математика дарсини ҳақиқатан ҳам физика ўқитувчиси ўтарди, лекин яқинда «олиб ташладик», — дейди Мухтор Солиев.
Мактаб ўқитувчиларининг таъкидлашича, бошланғич синфларга ўтилиши керак бўлган табиат фанини ҳам география мутахассислигига эга бўлган юқори синф ўқитувчиси ўтади.
— Ўзи бошланғичларга дарс соати етмайди, шундай бўлса-да бошланғич синф ўқитувчилари ўтиши керак бўлган табиат фани география ўқитувчисига бериб юборилган, — дейди бошланғич синф ўқитувчилари Бахтигул Ғофурова ҳамда Холида Худойқулова. Вилоят халқ таълими бошқармаси масъулларига ҳам шу бўйича мурожаат қилиб, бошланғич синф ўқувчиларига табиацҳунослик фанини ким ўтиши кераклигини сўрадик. Бошланғич синф ўқитувчилари дейишди. Аммо директор бундай фикрда эмас.
— 18 йилдан бери ўқитувчилик қиламан, аммо айни кунда бор-йўғи 2 соат дарс беришган, — дейди ўрта-махсус маълумотли бошланғич синф ўқитувчиси Феруза Панжиева. – Тўғри, олий маълумот олсам кўпайтиришар, аммо иш тажрибамга ҳам эътибор беришса бўларди-ку. «Завуч»нинг менда хусумати бор. Ҳатто менга қўл кўтаришгача борган.
Мактаб директорининг ўқув ишлари бўйича ўринбосари Шоира Самадова ўқитувчи Феруза Панжиева билан келишмовчиликка борганини тан олди, аммо қўл кўтарганини рад этди.
— Тўғри, ўртамизда дарс соатлари сабаб келишмовчилик бўлган, аммо қўл кўтарганим ёлғон, — дейди Шоира Самадова. — Аксинча, унинг ўзи мени синфхонага қамаб, чиқармасликка ҳаракат қилди.
Мактаб раҳбариятининг маълумот беришича, мактабда айни кунда 645 нафар бола таҳсил олади. Мактабда дарс берувчи 58 нафар ўқитувчининг 34 нафари бошланғич синф ўқитучилари.
— Бошланғич синф ўқитувчиларимиз ҳеч тинчимади, тинчимади-да, — дейди мактаб директори. — Нима қилишга ҳам ҳайронман.
Бахтигул Ғофурованинг фикрича, бунга мактабдаги адолатсизлик сабаб. Мактабда ўқитувчилар ўртасида дарс талашувлари авж олган. Ва оқибатда ҳатто ўқувчилар ҳам ўқитувчиларни ҳурмат қилмай қўйган.
— Мактабда қадримиз йўқ, мактаб раҳбари ва ўринбосарлари адолатсиз иш юритади. Энг ачинарлиси, мактабдаги машмашалар ва дарс ташалувлари сабаб ҳатто ўқувчилар ҳам бизни ҳурмат қилмай қўйди. Залда ўтаётган пайти бизни туртиб ўтишмоқда. Умуман қўрқишмайди ва ҳурмат қилишмаяпти.
Бошланғич синф ўқитувчиси Холида Худойқулованинг таъкидлашича, мактабдаги ушбу муҳитга мактаб раҳбарияти айбдор.
— Раҳбарлар уқувсиз, шу боисдан ҳам биз бошланғич синф ўқитувчиларидан раҳбар қўйилиши тарафдоримиз, — дейди Холида Худойқулова.
Таассуфки, мактабда дарс соатлари талаш бўлаётган бир пайтда ўқитувчиларнинг ўтилмаган дарси учун ҳақ тўлаш ҳолати ҳам мавжуд экан.
— Сентябрь ойида менга 9 соатга ҳақ тўлашган, аммо 6 соат дарс ўтганман, — дейди бошланғич синф ўқитувчиси Шаҳноза Эргашева.
Мутасадди буни қуйидагича изоҳламоқда.
— Ойлик иш ҳақларини ҳисоблаш вақти келганда ҳисобчи дастлабки маълумотга таяниб, ўқитувчимизга 9 соатга ҳақ тўлаган, — дейди Шоира Самадова. – Аммо кейинги ойда ортиқча тўланган пул ушлаб қолиниши керак эди. Аммо кейинги ой ушлаб қолиндими ёки йўқми буни аниқ билмайман.
Ушбу ҳудудда истиқомат қилувчи она тили ва адабиёт фани ўқитувчиси Ойбек Каримов ҳамда тарих фани бўйича магистр дипломига эга Муродулла Юсуповлар мактабдан дарс берилмаётганидан шикоят қилиб, ишга киришда таниш-билишчилик борлигига шаъма қилмоқда.
— Қишлоғимиздан 8-10 километр узоқликдаги мактабга қатнаб ишлайман, — дейди Ойбек Каримов. – Қиш пайтида қатнайман деб соғлиғимни йўқотдим, юзимдаги нерв томирларим шамоллаб, асоратлари қолди. Мудирга қатнайвериб, чарчадим. Қишлоғимиздаги 66-мактабдан дарс беринг десам, бир йил ишлаб туринг деб 24-мактабга юборишганди. Ҳалигача дарс бермай сарсон қилишяпти. «Завуч» ва бошқалар дарсни бўлиб олишиб, бизга имкон беришмаяпти. Мен ҳам қишлоғимда ишлашни, элимга нафим тегишини истайман. Туман халқ таълими бўлими мудири бизни эшитмайди, вилоят халқ таълими бошқармаси раҳбарига ҳам қатнаб чарчадим. Тополмайман.
Ушбу қишлоқдан чиққан ва тарих фанидан магистр дипломига эга Муродулла Юсупов қишлоғидаги ушбу мактабда тарих фанидан ортиқча дарс соатлари бўлишига қарамасдан қўшни қишлоқдаги 65-мактабга қатнаб ишлашга мажбур бўлаётганини айтмоқда.
— Социология мутахассислигига эга ўқитувчи, тарихдан дарс ўтяпти, мен ҳам мутахассисман, қишлоғимда ишлашни хоҳлайман, — дейди Муродулла Юсупов.
Муродулла Юсупов «Дарё» мухбирига мурожаат қилгани ва муаммо ҳақида айтгани боис директорнинг ўқув ишлари бўйича ўринбосари Шоира Самадованинг таҳдидига учраётганини билдирмоқда.
— Сен ёшлик қилдинг, ҳали кўрасан, деди Шоира Самадова, — дейди Муродулла Юсупов. – Майли нима дейишса, нима қилишса ҳам. Мен фақат ҳақимни талаб қиляпман. Ўзимнинг қишлоғимда 2 соат дарс беришса ҳам майли. Ишлайман.
Мурожаатни ўрганар чоғи, кўрган- кечирганларимиз ўқитувчиларнинг дарс талашувлари-ю мактаб раҳбариятининг ўзини оқлашга уриниши кўриб, мактабда ўқувчилар тақдири, дарс сифати ҳеч кимни ташвишлантирмаётганига гувоҳ бўлдик. Мактаб ўқитувчиларнинг дарди дарс соатини кўпайтириш бўлса, мактаб раҳбарияти сувдан қуруқ чиқишга интилмоқда. Болалар тақдири, дарс сифати эса кейинги ўринларда. Эссиз, эссиз...
Халқ таълими вазирлиги бунга нима деркин?
Изоҳ (0)