Тошкент шаҳар ҳокимлигида 27 ноябрь, чоршанба куни Беларусдан ташриф буюрган меҳмонлар билан учрашув бўлиб ўтди, деб хабар бермоқда пойтахт ҳокимлиги.
Фото: Тошкент шаҳар ҳокимлиги матбуот хизмати
Меҳмонларни қарши олган ҳокимнинг архитектура, капитал қурилиш ва коммуникацияларни ривожлантириш масалалари бўйича биринчи ўринбосари Даврон Хидоятов пойтахт аҳолиси электробусга ўрганиб қолганини, улар учун ушбу транспорт тури одатий бўлиб қолганини таъкидлаган.
Бироқ бутун шаҳар учун битта электробус камлиги, битта транспорт воситаси учун қувват олиш станциясини ишлатиш ва хизмат кўрсатувчи ходимларни ёллаш моддий жиҳатдан ўзини оқламаслиги айтилган. Истиқболда Ўзбекистонда электробуслар ишлаб чиқариш имконияти кўриб чиқилмоқда.
«Управляюшая компания холдинга Белкоммунмаш» ОАЖ бош директори Владимир Корол электробуснинг синов тариқасида фойдаланилиши билан боғлиқ ходимларнинг юқори малакаси ва аҳолининг қизиқишига алоҳида урғу берди:
«Биз электробуслар миқдорини кўпайтириш, ишлаб чиқаришни маҳаллийлаштириш каби мақсадларда қатор чораларни амалга оширувчи ишчи гуруҳни ташкил қилишга ва техник топшириқни ишлаб чиқишга тайёрмиз. Маълумки, Ўзбекистонга қўшни давлатлар электробусдан фойдаланиш тажрибасини эътибор билан кузатмоқда ва маҳаллий ишлаб чиқарувчилар ўз буюртмачиларини топишига ишончимиз комил».
Учрашувда электробуслар ҳаракатланиши учун алоҳида ҳаракатланиш чизиғини ажратиш масаласи кўриб чиқилган. Бу, ўз ўрнида, қувватни 30 фоизга тежашга, ҳаракатланиш тезлигини оширишга ва йўловчилар сонини оширишга ёрдам беради.
Хабарда айтилишича, меҳмонлар тошкентлик мутахассислар делегациясини Минск шаҳрига ташриф буюриб, муҳокама қилинаётган масалалар бўйича аниқ ечимларга келиш таклифини билдирди.
Эслатиб ўтамиз, Тошкент ҳокими Жаҳонгир Ортиқхўжаев ва «Белкоммунмаш» раҳбари Владимир Корол ўртасида 2018 йил сентябрида бўлиб ўтган музокаралар якунига кўра, Беларусь электробусларидан бирини Тошкентда синаб кўриш бўйича келишувга эришилган эди. 450 минг долларга харид қилинган биринчи электробус Тошкентда 13 сентябрдан ҳаракатланишни бошлаганди. Тошкент шаҳар ҳокимлиги бундай электробуслар сони 10 та етказилишини маълум қилган.
