27 ноябрь, чоршанба куни Сирдарё вилояти Бахт шаҳрида ҳайдовчилар йўлни тўсиб, газ «заправка»ларда газ қуйилмаётганидан норозилигини намойиш қилди. Ҳолат акс этган видео ижтимоий тармоқларда тарқалганидан сўнг  Сирдарё вилояти ИИБ ЙҲХБ матбуот хизмати воқеа юзасидан муносабат билдирди.

Фото: Видеодан кадр

Қайд этилишича, 27 ноябрь куни М-34 йўл 89 километр йўл ёқасида жойлашган «Шератон-сервис» МЧЖга қарашли Автомобильларга газ тарқатиш корхонаси олдида бир қанча фуқаролар газ қуйиш шохобчасида норозилик билдириб, шу ерда фуқаролар кутиш жойидаги стулларни олиб М-34 йўлининг Тошкент—Гулистон йўналишини вақтинча тўсган. Йўлда эса автомашиналар тирбанд бўлиб тўхтаб қолган.

Воқеа жойига зудлик билан Сирдарё вилояти ЙҲХБ ва Сирдарё тумани ИИБ масъул ходимлари етиб бориб, вазиятни ўрганган.

Маълум бўлишича, ушбу газ тарқатиш шохобчаси бугун тонгда ишга туширилган бўлиб, хайдовчилар эса кечадан бери навбат кутиб турган. Соат тахминан 11:00 ларда ўзларини «Ўзнефтгаз» инспекцияси, МИБ, «Ўзтрансгаз» агентлиги ходимлари  деб таништирган шахслар келиб газ ҳисоблаш мосламасини текшириш учун олиб кетган. Навбатда турган 5—6 нафар ҳайдовчилар эса ушбу ҳолатга ўз норозиликларини билдириб, М-34 йўлининг Тошкент—Гулистон йўналишини беркитган.

Сирдарё вилояти ЙҲХБ хабарида айтилишича, олиб борилган тушунтириш ишларидан сўнг у ерга йиғилган ҳайдовчилар тарқатилиб, зудлик билан йўлда ҳаракат тикланган.