Ҳиндистоннинг Panorama Studios кино компанияси томонидан Ўзбекистонда «Khuda Hafiz» номли романтик жангари фильмни суратга олинмоқда. Фильмнинг жангари саҳналари Қорақалпоғистоннинг Элликқалъа туманида суратга олинди. Бу ҳақда «Дарё»га «Ўзбеккино» матбуот хизмати маълум қилди.
Кадр: YouTube
«Khuda Hafiz» фильмига Ҳиндистон, АҚШ, Россия ва бошқа Европа давлатларидан 150 дан ортиқ актёрлар, шунингдек, Муқимий номидаги ўзбек давлат мусиқали театри актёри Отабек Ҳақбердиев жалб этилган.
Матбуот хизматининг хабарида мамлакатимизда кинони қўллаб-қувватлаш учун яратилган механизмлар бугунги кунда нафақат янги ҳамкорлар билан ишлаш, балки юртимизга хорижий инвестицияларни жалб этиш имконини ҳам бермоқда. Масалан, биргина ҳинд киноижодкорлари томонидан ушбу фильм учун Ўзбекистонда сарфланадиган маблағ бир миллион долларга тенг, дейилади.
Ҳинд кино ижодкорларининг «Panorama Studios» студияси Ўзбекистонда олинадиган отишма тасвирларини якунлади ва фильмнинг қолган қисмини суратга олиш ишлари Ҳиндистонда давом этади.
Эслатиб ўтамиз, фильм премьераси 2020 йилда бўлиши режалаштирилган.
