Боёвутлик 14 ёшли қизчанинг кишини ҳайратга солувчи санъат асарлари (фото)

Фарзона Жўрақулова Сирдарё вилоятининг Боёвут туманидаги 5-сонли мусиқа ва санъат мактабининг санъат бўлими 5-синфида таҳсил олади, деб ҳикоя қилади «Xabar.uz».

14 ёшга тўлган ижодкор 2015 йилдан бери таълим масканида ҳайкалтарошлик сирларини ўрганиб келмоқда. Бир қанча кўрик-танловлар ғолиби.

2016 йилда «Камалак юлдузлари» Болалар ижодиёти фестивали республика босқичи ғолиби бўлди. 2018 йил апрелда Сирдарё вилояти Маънавият ва маърифат кенгаши томонидан таъсис этилган «Юксак маънавиятли авлод» ёшлар фестивалида «Энг ёш кулол» номинацияси билан тақдирланди. Ўша йили Гулистон шаҳрида бўлиб ўтган «Болалар мусиқа ва санъат мактаблари ўқувчиларининг санъат йўналиши» бўйича танловнинг вилоят босқичида 1-даражали диплом билан тақдирланди.

Жорий йилнинг апрель ойида Сирдарё вилояти Бадиий ижодкорлар уюшмаси томонидан ташкиллаштирилган анъанавий «Тасвирий санат фестивали»да «Энг яхши асар муаллифи» номинацияси ғолиби бўлди ва энг фаол иштирокчи сифатида қайд этилиб, Ўзбекистон Бадиий ижодкорлар уюшмаси раисининг фахрий дипломи билан тақдирланди.

Фарзона ҳозирда мактабгача ва бошланғич таълим ёшидаги болажонлар учун йўл ҳаракати қоидаларини ўзлаштиришнинг қулай усули – ҳайкалчалар ёрдамида йўлда ҳаракатланиш, светофорга риоя этиш, пиёдалар йўлагидан фойдаланиш қоидалари устида изланмоқда.

Фарзонанинг «Насриддин бобо», «Афсонавий кулол», «Гимнастикачи қиз», «Аждодларимиз мероси», «Арслон», «Хаёл», «Нажот», «Скрипкачи қиз», «Қўзиқорин бобо» каби ишлари айниқса таҳсинга сазовор, дейилади хабарда.