Танзила Норбоева ўзининг Сенат раиси этиб сайланиши мутлақо кутилмаганда юз берганини, у ҳам бошқалар каби Сенат раиси декабрда бўладиган сайловлардан сўнг ўзгаришини кутганини маълум қилди. У бу ҳақда блогер Кирилл Альтманнинг Alter Ego дастурига берган интервьюсида айтиб ўтди.
Албатта, мен учун ҳам катта бир кутилмаган ҳолат бўлди бу. Узоқ йиллар жамоатчилик билан ишлаган бўлсам-да. Бундан аввал Хотин-қизлар қўмитаси раиси, бош вазир ўринбосари сифатида кўпроқ жамоатчилик билан ишлаган бўлсам, ундан аввал 6 йил мобайнида Касаба уюшмалари федерацияси раиси бўлганман, бу ҳам жамоатчилик иши, халқ ичида бўлганман. Вазифаларимни катта иштиёқ, сермаҳсуллик билан бажарганман. Ўзимни аямай ишлаганман, деб ҳисоблайман.Шунга қарамай, Сенат раиси лавозимини эгаллаш таклифи мен учун умуман кутилмаган ҳолат бўлди. Нимани кутсам ҳам, буни мутлақо кутмаганман. Чунки тез орада янги парламент сайловлари бўлади, сайловлар олдидан бу таклифнинг берилиши мутлақо кутилмаган ҳолат эди. Агар кадрларни алмаштириш, Сенат раиси, спикер ёки қўмиталарнинг бошқа раисларини сайлаш зарурати туғилса, буларнинг барчаси сайловлардан кейин юз беришини кутамиз. Ҳамма шуни кутган эди.
Таклифни ҳақиқатан ҳам катта миннатдорлик билан қабул қилдим. Сенаторларнинг барчаси номзодимни бир овоздан маъқуллади, чунки улар халқ вакиллари. Улар мен учун янги одамлар эмас, барчалари билан бунгача ҳудудларда, айниқса, ижтимоий йўналишдаги, аёллар, меҳнат муносабатлари билан боғлиқ муаммоларни ҳал этишда бирга ишлаганман.
Бошқалар юқори лавозимларни эгаллаш таклифларини рад этишганми ёки йўқ, бу менга қоронғу. Аммо рад эта олишмайди, деган гапга қўшилмайман. Исталган одам рад қилиши мумкин.
Ошкора бўлмаса ҳам, қандайдир шахсий муаммолари, саломатлиги, оилавий муаммолари ишга тўлиқ ўзини бағишлашига имкон бермаслигини айтиши мумкин. Раҳбарият, албатта, тушуниб қабул қилади. Рад этиб бўлмайди, деган гаплар нотўғри.
Танзила Норбоева, Ўзбекистон Сенати раиси
Изоҳ (0)