Ўзбекистон Олий Мажлиси Қонунчилик палатасида «2020 йил учун Ўзбекистон Республикасининг Давлат бюджети тўғрисида»ги қонун лойиҳаси муҳокама қилинмоқда. Бу ҳақда Қонунчилик палатаси ахборот хизмати хабар берди.

Фото: Қонунчилик палатаси ахборот хизмати

Мазкур қонун лойиҳасига асосан республика бюджети Олий Мажлис томонидан, маҳаллий бюджетлар эса, жойлардаги маҳаллий кенгашлар томонидан қабул қилинади. Харажатлар соҳалар бўйича эмас, балки вазирлик ва идоралар кесимида тасдиқланади.

Депутатлар томонидан таъкидлашинича, жорий этилаётган янги амалиётнинг яна бир ўзига хос жиҳати — марказлашган бюджет сиёсатидан босқичма-босқич воз кечиш.

Унга кўра, маҳаллий бюджетлар даромадини мустаҳкамлаш мақсадида автомототранспорт воситаларини рўйхатдан ўтказиш йиғимлари маҳаллий бюджетга ўтказилмоқда. Алкогол маҳсулотлари ва мобил алоқа хизматини кўрсатиш учун акциз солиғи тушумлари аҳоли сонидан келиб чиқиб, ҳудудлар ўртасида қайта тақсимланади. Қўшимча қиймат солиғи ва юридик шахслардан олинадиган фойда солиғи бўйича прогноздан орттириб бажарилган қисми тўлиқ ҳудудларда қолдирилади.

Шу кунга қадар Ўзбекистондаги маҳаллий ҳокимликлар ўз бюджетини қабул қилишда ҳеч қандай ваколатга эга эмас эди. Шу тариқа, халқ депутатлари маҳаллий кенгашлари ўзларига тегишли бўлган бюджетни қабул қилишдаги мустақиллиги таъминланмоқда.