Вазирлар Маҳкамаси ҳузуридаги Таълим сифатини назорат қилиш давлат инспекцияси бошлиғи Улуғбек Ташкенбаев томонидан Наманган вилоятидаги Халқ таълими ходимларини қайта тайёрлаш ва уларнинг малакасини ошириш минтақавий марказида фаолияти ўрганилди. Бу ҳақда инспекцияси матбуот хизмати хабар берди.
Фото: Таълим сифатини назорат қилиш давлат инспекцияси матбуот хизматиЎрганишлар жараёнида таълим сифати билан боғлиқ бўлган қатор камчиликлар мавжудлиги ва уларни бартараф этиш юзасидан муассаса раҳбарияти томонидан тизимли ишлар амалга оширилмаётганлиги қайд этилган. Жумладан, ноябрь ойи режасига мувофиқ 16 та малака ошириш йўналишлари бўйича ташкил этилган 25 та гуруҳларда (режа бўйича жами 625 нафар тингловчи) тингловчиларнинг машғулотларга қатнашишлари юзасидан тушунтириш ишлари талаб даражасида ташкил этилмаганлиги сабабли ўқув машғулотлари бошланганига бир ҳафта бўлган бўлса-да, дарс машғулотларига сурункали иштирок этмаганликлари учун 11 нафар тингловчилар малака ошириш курсидан четлаштирилган.
Таълим муассасаси биносида жами 36 та ўқув хоналари мавжуд бўлиб, шундан 19 та проектор, 9 та смарт телевизор ҳамда 5 та электрон доскалар билан таъминланган. Лекин ушбу замонавий ахборот-коммуникация технологияларидан дарс машғулотларида самарали фойдаланишда педагог кадрларнинг билим ва кўникмалари етишмайди.
Масалан, «Мактабгача таълим тарбиячилари» йўналишидаги «Мутахассислик методикаси» ўқув модули бўйича дарс таҳлили кузатилганда мавзуга оид электрон анимацияли ўқув материаллари мавжуд бўлса-да, ўқув хонасидаги компьютер ва Smart LED электрон доскасидан фойдаланиш, ҳатто уни ишлатиш ва дарс жараёнида фойдаланиш кўникмаларига ҳам эга эмаслиги қайд этилган.
Ўрганиш якунларида Таълим инспекцияси бошлиғи Улуғбек Ташкенбаев раислигида таълим сифатини оширишда учрайдиган камчиликларни бартараф этиш чораларини белгилаш мақсадида вилоятдаги 3 та олий таълим муассасалари ректорлари, проректорлар, вилоят халқ таълими бошқармаси бошлиғи ҳамда Халқ таълими ходимларини қайта тайёрлаш ва уларни малакасини ошириш минтақавий маркази раҳбарияти, кафедра мудирлари иштироки танқидий равишда муҳокама қилинган.
Муҳокама жараёнида мавжуд камчиликларни бартараф этиш ҳамда амалий ёрдам кўрсатиш мақсадида кимё йўналиши бўйича тингловчиларнинг лаборатория амалий машғулотларини сифатли ташкил этиш юзасидан вилоят халқ таълими бошқармаси томонидан зарур кимёвий реактивлар билан таъминлаб берилишига эришилган.
Изоҳ (0)