Сўнгги вақтларда «ўзбек нонуштаси» ибораси оммалашиб бормоқда ва табиийки, унга бўлган қизиқиш ҳам ортиб бормоқда. Бугунги кунда Ўзбекистонда ўзбек нонуштасини оммалаштириш борасида қандай ишлар олиб борилмоқда? Ўзбекистон Гастрономик туризм ассоциасияси раиси Гулноза Одилова бу борада қилинаётган ишлар хусусида сўз юритади.
Ўзбекистон Ошпазлар уюшмаси томонидан Туризмни ривожлантириш давлат қўмитаси кўмагида республикадаги жами 30 дан ортиқ меҳмонхонада миллий нонуштамизни жорий қилишга доир семинар-тренинглар ўтказилди. Тренинг ўтказилган меҳмонхоналарнинг барчаси ҳозирда ташриф буюрувчиларни ўзбекона нонушта билан хушнуд этмоқда.Меҳмонхона бошқарувчиларининг таъкидлашича, сайёҳлар анъанавий европача нонушта эмас, айнан ўзбек нонуштаси тақдим этиладиган залга кўпроқ кириши кузатилмоқда. Бироқ ўзбек нонуштаси жорий этилган меҳмонхоналар сони етарлича эмас.
Шу нуқтаи назардан, жорий йилнинг декабрь ойидан республикамиз ҳудудлари бўйлаб меҳмонхона вакиллари учун маҳорат дарслари ва тарғибот тадбирларини ўтказишни белгилаб олганмиз.
Шуниси қувонарлики, бугунга келиб Туркия, Италия, Франция, Германия, Бельгия каби қатор хорижий давлатлардаги ҳамкорларимиз ўзбек нонуштасини ўз меҳмонхоналарида жорий этиш ташаббуси билан чиқишмоқда. Ҳозирда Ўзбекистон Ошпазлар уюшмаси томонидан комплекс ўзбек нонуштасининг таркиби, тайёрланиши, безатилиши, рецептлари мезонлари ишлаб чиқилди. Нонушта таркибига кирувчи ҳар бир маҳсулотнинг килокалорийси ҳисоблаб чиқилди. Таъкидлаш лозимки, Туризмни ривожлантириш давлат қўмитаси томонидан ажратилган грант маблағлари ҳисобидан Ўзбекистон Ошпазлар уюшмаси томонидан ассоциасиямиз билан ҳамкорликда ресторан ҳамда меҳмонхоналар учун махсус «Ўзбек нонуштаси» методик қўлланмаси ва тренинг дастури яратилди.
Юртимизда фаолият кўрсатадиган меҳмонхона ва умумий овқатланиш объектларига ушбу қўлланма ва дастур асосида миллий нонуштамизни жорий этиш кўзда тутилган.
6—8 ноябрь кунлари Ўзбекистон Ошпазлар уюшмаси ҳамда Бутунжаҳон ошпазлар уюшмаси (WACS) ҳамкорлигида ўтказилиши режалаштирилган халқаро кулинар чемпионати доирасида ўзбек миллий нонуштасининг тақдимоти ўтказилади. Мазкур чемпионатнинг шартларидан бири сифатида «этно-нонушта»ни тайёрлаш киритилган бўлиб, 50 дан ортиқ мамлакатдан ташриф буюрган иштирокчилар ўз миллий нонушдаларини тақдим этишади, Ўзбекистон ошпазлар терма жамоаси ҳам ўзбек нонуштасини тайёрлаб кўрсатиши режалаштирилган. Бу эса халқаро доирадаги ҳакамлар ва кулинария чемпионатларида кўплаб соврин ва медалларга эга бўлган иштирокчилар орасида миллий нонуштамизни тарғиб этиш йўлидаги муҳим бир қадам сифатида хизмат қилади.
Маълумот учун, 5 ноябрь куни соат 16:00 да Ёшлар ижодиёт саройида ушбу мавзуга қизиқувчи барча мутахассислар, журналистлар ва блогерларни биринчи Халқаро кулинар чемпионати очилиши муносабати билан ўтказиладиган матбуот анжуманига таклиф этамиз.
Матбуот анжумани давомида ‘Ўзбек нонуштасиъни жорий этиш ва оммалаштириш борасида олиб борилаётган ишлар ҳақида маълумот берилиши ҳамда «Ўзбек нонуштаси» методик қўлланмасининг тақдимоти ўтказилиши режалаштирилган.
Ўзбекистон Гастрономик туризм ассоциасияси барча меҳмонхона ва умумий овқатланиш соҳаси вакилларига миллий нонуштамизни ўз таомномаларига киритишни тавсия қилади. Зеро, кўп асрлик миллий пазандачилигимиз анъаналарини ўзида мужассам этган, табиий, маҳаллий маҳсулотлардан тайёрланган ўзбек нонуштасини татиб кўриш ҳар бир сайёҳ учун мароқли жараён бўлиши билан бирга, меҳмонхона бюджети маблағларининг тежалишига ҳам хизмат қилади. Ўзбек нонуштасини жаҳон миқёсида тарғибот қилиш баробарида уни хорижлик сайёҳларимизга миллий меҳмондўстлигимиз намунаси сифатида тақдим этиш ҳар биримизнинг бурчимиздир».
Гулноза Одилова, Ўзбекистон Гастрономик туризм ассоциасияси раиси
Изоҳ (0)