So‘nggi vaqtlarda “o‘zbek nonushtasi” iborasi ommalashib bormoqda va tabiiyki, unga bo‘lgan qiziqish ham ortib bormoqda. Bugungi kunda O‘zbekistonda o‘zbek nonushtasini ommalashtirish borasida qanday ishlar olib borilmoqda? O‘zbekiston Gastronomik turizm assosiasiyasi raisi Gulnoza Odilova bu borada qilinayotgan ishlar xususida so‘z yuritadi.
O‘zbekiston Oshpazlar uyushmasi tomonidan Turizmni rivojlantirish davlat qo‘mitasi ko‘magida respublikadagi jami 30 dan ortiq mehmonxonada milliy nonushtamizni joriy qilishga doir seminar-treninglar o‘tkazildi. Trening o‘tkazilgan mehmonxonalarning barchasi hozirda tashrif buyuruvchilarni o‘zbekona nonushta bilan xushnud etmoqda.Mehmonxona boshqaruvchilarining ta’kidlashicha, sayyohlar an’anaviy yevropacha nonushta emas, aynan o‘zbek nonushtasi taqdim etiladigan zalga ko‘proq kirishi kuzatilmoqda. Biroq o‘zbek nonushtasi joriy etilgan mehmonxonalar soni yetarlicha emas.
Shu nuqtai nazardan, joriy yilning dekabr oyidan respublikamiz hududlari bo‘ylab mehmonxona vakillari uchun mahorat darslari va targ‘ibot tadbirlarini o‘tkazishni belgilab olganmiz.
Shunisi quvonarliki, bugunga kelib Turkiya, Italiya, Fransiya, Germaniya, Belgiya kabi qator xorijiy davlatlardagi hamkorlarimiz o‘zbek nonushtasini o‘z mehmonxonalarida joriy etish tashabbusi bilan chiqishmoqda. Hozirda O‘zbekiston Oshpazlar uyushmasi tomonidan kompleks o‘zbek nonushtasining tarkibi, tayyorlanishi, bezatilishi, reseptlari mezonlari ishlab chiqildi. Nonushta tarkibiga kiruvchi har bir mahsulotning kilokaloriysi hisoblab chiqildi. Ta'kidlash lozimki, Turizmni rivojlantirish davlat qo‘mitasi tomonidan ajratilgan grant mablag‘lari hisobidan O‘zbekiston Oshpazlar uyushmasi tomonidan assosiasiyamiz bilan hamkorlikda restoran hamda mehmonxonalar uchun maxsus “O‘zbek nonushtasi” metodik qo‘llanmasi va trening dasturi yaratildi.
Yurtimizda faoliyat ko‘rsatadigan mehmonxona va umumiy ovqatlanish obyektlariga ushbu qo‘llanma va dastur asosida milliy nonushtamizni joriy etish ko‘zda tutilgan.
6—8-noyabr kunlari O‘zbekiston Oshpazlar uyushmasi hamda Butunjahon oshpazlar uyushmasi (WACS) hamkorligida o‘tkazilishi rejalashtirilgan xalqaro kulinar chempionati doirasida o‘zbek milliy nonushtasining taqdimoti o‘tkaziladi. Mazkur chempionatning shartlaridan biri sifatida “etno-nonushta”ni tayyorlash kiritilgan bo‘lib, 50 dan ortiq mamlakatdan tashrif buyurgan ishtirokchilar o‘z milliy nonushdalarini taqdim etishadi, O‘zbekiston oshpazlar terma jamoasi ham o‘zbek nonushtasini tayyorlab ko‘rsatishi rejalashtirilgan. Bu esa xalqaro doiradagi hakamlar va kulinariya chempionatlarida ko‘plab sovrin va medallarga ega bo‘lgan ishtirokchilar orasida milliy nonushtamizni targ‘ib etish yo‘lidagi muhim bir qadam sifatida xizmat qiladi.
Ma’lumot uchun, 5-noyabr kuni soat 16:00 da Yoshlar ijodiyot saroyida ushbu mavzuga qiziquvchi barcha mutaxassislar, jurnalistlar va blogerlarni birinchi Xalqaro kulinar chempionati ochilishi munosabati bilan o‘tkaziladigan matbuot anjumaniga taklif etamiz.
Matbuot anjumani davomida ‘O‘zbek nonushtasi’ni joriy etish va ommalashtirish borasida olib borilayotgan ishlar haqida ma’lumot berilishi hamda “O‘zbek nonushtasi” metodik qo‘llanmasining taqdimoti o‘tkazilishi rejalashtirilgan.
O‘zbekiston Gastronomik turizm assotsiasiyasi barcha mehmonxona va umumiy ovqatlanish sohasi vakillariga milliy nonushtamizni o‘z taomnomalariga kiritishni tavsiya qiladi. Zero, ko‘p asrlik milliy pazandachiligimiz an’analarini o‘zida mujassam etgan, tabiiy, mahalliy mahsulotlardan tayyorlangan o‘zbek nonushtasini tatib ko‘rish har bir sayyoh uchun maroqli jarayon bo‘lishi bilan birga, mehmonxona budjeti mablag‘larining tejalishiga ham xizmat qiladi. O‘zbek nonushtasini jahon miqyosida targ‘ibot qilish barobarida uni xorijlik sayyohlarimizga milliy mehmondo‘stligimiz namunasi sifatida taqdim etish har birimizning burchimizdir”.
Gulnoza Odilova, O‘zbekiston Gastronomik turizm assosiasiyasi raisi
Izoh (0)