Sog‘liqni saqlash vazirligi saytida 29-oktabr, seshanba kuni “‘Navoiyazot’ga qarashli PVX zavodida yuz bergan favqulodda holatdan jabrlanganlarga tibbiy yordam ko‘rsatilmoqda” sarlavhali xabar e’lon qilingan edi. 30-oktabr kuni “O‘zkimyosanoat” matbuot xizmati bu xabarga raddiya berib, 28-oktabr kuni PVX zavodi va umuman “Navoiyazot”da hech qanday favqulodda holat yuz bermaganini ma’lum qildi.
Mavzuga doir: “Navoiyazot”ga tegishli PVX zavodida 4 kishi noma’lum gazdan zaharlanib kasalxonaga yotqizildi
Avvalo ta’kidlashimiz lozimki, inson hayoti va salomatligi bilan bog‘liq har qanday holat biz tibbiyot xodimlari uchun favqulodda vaziyat hisoblanadi.So‘nggi ma’lumotlarga ko‘ra, 28-oktabr kuni soat 18:30 da “Navoiyazot” AJ xizmat mashinasida tarjimon kuzatuvida to‘rt fuqaro ko‘ngil aynish, qayt qilish, nafas qisishi, bosh aylanishi shikoyatlari bilan Respublika shoshilinch tibbiy yordam ilmiy markazi Navoiy viloyat filiali qabul bo‘limiga olib kelingan.
Kuzatuvchi tarjimonning so‘zlariga ko‘ra, soat 16:00 da “Navoiyazot” hududidagi “PVX, kaustik soda va metanol ishlab chiqarish majmuasi” qurilishida to‘satdan havoda o‘tkir gaz hidi paydo bo‘lgan. Natijada uch nafar ishchi ish joyida nafasi siqilib yiqilgan. Jabrlanuvchilar kuzatuvchilar yordamida voqea joyidan zudlik bilan “Navoiyazot” AJ Tibbiy sanitariya qismiga olib borilgan. Birlamchi shifokor ko‘rigidan so‘ng Respublika shoshilinch tibbiy yordam ilmiy markazi Navoiy viloyat filialiga yuborilgan.
“Filialimiz qabul bo‘limida toksikolog vrach ko‘rigidan so‘ng, bemorlarda yuqori nafas yo‘llari shilliq qavatlarida giperemiya, shish aniqlangan. Bemorning shikoyati, anamnezi, obyektiv ko‘rigi asosida ‘Noma’lum gazdan (razdrajayushiy) ingalyatsion zaharlanish, yengil darajasi’ dastlabki tashxisi qo‘yilgan. Bemorlar tekshirish va davolash maqsadida Toksikologiya bo‘limiga yotqizilgan. Bo‘limda toksikolog ko‘rigidan so‘ng boshqa turdagi zaharlanish klinik belgilari bo‘lmagani sababli, shuningdek, oziq-ovqatdan zaharlanish tashxisi ham inkor etilgan”, — deydi RShTYoIM viloyat filiali direktori O.Inomov.
Ma’lum bo‘ladiki, bemorlarning shikoyati, anamnezi, klinik belgilaridan kelib chiqqan holda aytish mumkinki, oziq-ovqatdan zaharlanish alomatlari bo‘lmagan. Noma’lum gazdan zaharlanish tashxisining asosi esa bemorlarning shikoyati, hodisa sodir bo‘lgan vaziyat va ko‘rik vaqtida aniqlangan klinik o‘zgarishlar hisoblanadi.
Kasb mas’uliyatidan kelib chiqqan holda har bir shifokor uchun u kim bo‘lishidan qat’i nazar inson hayoti ustuvor hisoblanadi. Shundan kelib chiqqan holda Sog‘liqni saqlash vazirligi bundan buyon ham odamlar salomatligiga tahdid soluvchi har qanday vaziyatni favqulodda holat hisoblab, zudlik bilan tezkor va sifatli tibbiy xizmat ko‘rsatishda davom etadi.
Sog‘liqni saqlash vazirligi Jamoatchilik bilan aloqalar bo‘limi axborotidan
Izoh (0)