Ердан 4 600 ёруғлик йили нарида жуда катта зичликка эга бўлган шарсимон материя мавжуд. У – бир замонлар чарақлаб яшаб ўтган ва аллақачон сўнган юлдуздан қолган бор-йўқ қолдиқ нарса холос аслида. Бундай жисмларни астрономлар нейтрон юлдуз дейишади. Бугунги кунга келиб шу нарса аён бўлмоқдаки, ўша 4 600 ёруғлик йили наридаги атиги 20 километр диаметрга эга қолдиқ – нейтрон юлдуз – коинотдаги энг катта массали нейтрон юлдуз экан! Бу ҳақда Nature Astronomy журналида хабар қилинган.

Фото: VideoNews

Унинг массаси бизнинг Қуёш массасидан 2,14 марта катта бўлиб, бу физика қонунлари бўйича эришиш мумкин бўлган энг катта, чегаравий массага жуда яқиндир.

Астрономияда бу нейтрон юлдуз J0740+6620 номи билан қайд этилади ва у ўз ўқи атрофини бир сонияда 289 марта айланиб чиқади. Яъни бу юлдуз пульсар ҳамдир. Яқиндагина олимлар унинг массасини катта аниқликда ҳисоблашди ва у Қуёшдан 2,14 марта оғир экани маълум бўлди. Шунга кўра, эндиликда J0740+6620 коинотдаги энг оғир нейтрон юлдуз мақомига эга бўлди. Аввалги энг оғир нейтрон юлдуз массаси Қуёш массасидан 2,01 марта катта эди.

Ушбу пулсарни Green Bank ва Arecibo радиотелескоплари тўплаган маълумотлар орқали синчиклаб ўрганилди. Ушбу расадхоналар айнан шу каби пулсарларни кузатиш учун махсус ишга туширилган NANOGrav лойиҳасининг таркибий бир қисмидир.

Ушбу радиотелескоплар воситасида мазкур нейтрон юлдуз кузатилганда, олимлар радиотўлқин маълумотлари кутилганидан кўра бироз кечикаётганини пайқаб қолди. Бундай кечикиш фанда «Шапиро эффекти» дейилади, у мазкур эффектни кашф қилган астрофизик олим – Ирвин Шапиро шарафига номланган. Бу эффект кузатилаётган объект яқинида яна бир қандайдир йирик массали объект айланаётгани туфайли юзага келади ва ўша иккинчи объект ўз ҳаракати билан радиотўлқинлар кечикишига омил бўлади.

Синчиклаб кузатишлар шуни кўрсатдики, ҳақиқатан ҳам ушбу нейтрон юлдуз яқинида яна бир оқ митти бор экан ва у ҳам жуда катта шиддат билан нейтрон юлдуз атрофида айланар экан. Айнан ушбу кечикиш вақтини асос қилиб олиш билан олимлар ўша оқ митти ва нейтрон юлдуз массасини ҳисоблашга муваффақ бўлди. Ва, юқорида айтилганидек, ҳисоблаш натижалари J0740+6620 нейтрон юлдузлар орасида рекордчи эканини кўрсатди.

Қизиғи шундаки, J0740+6620 физика қонунлари йўл қўядиган энг чегаравий массага эга нейтрон юлдуздир. Зеро, йирик юлдузлар ҳаётининг энг сўнгги кунида, сўниш арафасида портлаганда, коинотда ўта янги чақнаши рўй беради ва юлдуз тириклигида массаси қандай бўлганига қараб у ёки нейтрон юлдузга ёки қора туйнукка айланади. 2017 йилда олимлар ушбу масса чегарасини ҳисоблаб ҳам чиқиқан эди. Агар юлдуз массаси Қуёш массасидан 2,17 марта ва ундан каттароқ бўлса, у албатта қора туйнукка айланади; ундан кичик масса эса нейтрон юлдузни ҳосил қилади. J0740+6620 эса 2,14 Қуёш массаси билан бу чегарага жуда яқин келган. Бундай катта массага эга объектларда эса физика ғалати ва ғайриоддий хулосаларни тақдим этади. Бу борада олимлар назарий тахминларга ҳам унчалик шошилмайди.