Сирдарёда божхоначилар 2 млрд сўмлик антиквар бойликларнинг мамлакатдан олиб чиқиб кетилишини тўхтатди
Сирдарё вилояти божхона бошқармаси ходимлари маданий бойликларни ноқонуний олиб чиқилиши билан боғлиқ йирик қонунбузарликка чек қўйди. Бу ҳақда Давлат божхона қўмитаси ахборот хизмати хабар бермоқда.
Маълум қилинишича, «Сирдарё» чегара божхона постига Lacetti автомашинасида кириб келган фуқаро Х.Д.нинг хатти-ҳаракатлари божхоначилар эътиборини тортган. Шундан сўнг автомобиль ва унинг тиркамасидаги юклар ҳайдовчи ва холислар иштирокида божхона кўригидан ўтказилган.
Натижада, ушбу шахс декларацияда кўрсатилмаган ва божхоначиларнинг оғзаки сўровида маълум қилинмаган, Маданият вазирлигининг тегишли рухсатномаси бўлмаган, 32 дона турли кўринишдаги ҳайкал, бир дона икона, бир дона хоч, 12 дона кўза ҳамда бир дона вазани яширинча олиб чиқмоқчи бўлганлиги аниқланган.
Ўзбекистон Республикаси Маданият вазирлиги Бадиий экспертиза хулосасига кўра, ушбу маданий бойликлар XVII аср охири — XVIII аср бошларида Хитой ҳамда XIX аср охири ва ХХ аср бошларида Ғарбий Европа давлатларида ишлаб чиқарилганлиги ва уларнинг умумий қиймати 2 миллиард сўмдан ортиқни ташкил этиши маълум бўлди.
Ҳозирда ушбу ҳолат юзасидан божхона органлари томонидан суриштирув ҳаракатлари давом эттирилмоқда.
