Самарқанд вилоятининг Паяриқ туманида 24 октябрь куни қасддан одам ўлдирган икки ўқитувчига жиноят иши қўзғатилди. Бу ҳақда Бош прокуратура матбуот котиби Ҳаёт Шамсутдинов хабар берди.
Маълум бўлишича, 36 ёшли ўқитувчи Азиз С. ва 35 ёшли ўқитувчи ва Ҳамид Б. ветеринария бўлими ходими бўлган 35 ёшли таниши Умид С. билан ўзаро келишмовчилик туфайли жанжаллашиб, танасининг турли жойларига уриб, қасддан ўлдирган. Сўнг марҳумни ўзига тегишли бўлган автомашинаси ичига ўтқизиб, воқеа жойидан яширинган.
Мазкур ҳолат юзасидан Паяриқ тумани прокуратураси томонидан Азиз С. ва Ҳамид Б.ларга нисбатан Жиноят кодексининг 97-моддаси 2-қисми «п» банди (Бир гуруҳ шахслар томонидан қасддан одам ўлдириш) билан жиноят иши қўзғатилган. Ушбу моддада 15 йилдан 25 йилгача озодликдан маҳрум қилиш ёки умрбод озодликдан маҳрум қилиш жазоси белгиланган.
Тергов ҳаракатлари олиб борилмоқда.