Андижон вилоят ҳокимлиги Президентга видеомурожаат йўллаган тадбиркор Юсупов иши бўйича баёнот берди

Ижтимоий тармоқларда хусусий тадбиркор Шавкат Юсуповнинг Президентга видеомурожаати тарқалгани юзасидан Андижон вилояти ҳокимлиги расмий баёнот берди.

Бундан аввал Бош прокуратура, Пойтахт ИИББ ҳам ушбу масала юзасидан изоҳ берганди.

Қайд этилишича, шу йилнинг август—сентябрь ойларида Андижон вилояти Олтинкўл туманининг «Узун» кўча маҳалла фуқаролар йиғини ҳудудидаги собиқ «Арғумон Олтинкўл» чорвачилик ва фермер хўжалигига тегишли ер ва объектлар аукционда Шавкатбек Юсупов томонидан сотиб олинган. Бироқ у мазкур жойда тадбиркорликни йўлга қўйиб, янги иш ўринлари яратиш ўрнига бор нарсаларни бузилиб олиб чиқиб сотиб юборган.

Тадбиркор ва маҳалла аҳли ўртасидаги муносабат яхши эмаслиги сабабли вилоят ҳокими Шуҳратбек Абдураҳмонов ушбу масалага ойдинлик киритиш мақсадида фермер хўжалигида бўлиб, кенг муҳокамалар олиб борилганлиги ҳамда кўтарилган ушбу масала юзасидан суд жараёнлари кетаётгани, қонуний ечим топиш кераклиги маълум қилинган.

Ўтган давр мобайнида бу масала ижтимоий тармоқларда кўплаб муҳокамага сабаб бўлмоқда. Шу сабабли Андижон вилоят ҳокимлиги бу масала айни вақтда қандай ҳолатда эканлигини билиш мақсадида Андижон вилоят прокурорининг биринчи ўринбосари Камолиддин Йўлбарсовга мурожаат қилган. Қуйида Камолиддин Йўлбарсов томонидан келтирилган жавоб тўлиғича ҳавола этилди.

— Юсуповнинг раҳбарлигидаги «Юксак блок инвест» МЧЖ Олтинкўл туманида жойлашган ферма бино иншоотларини аукцион савдосида 326 миллион сўмга сотиб олган. Сотиб олинган бино иншоотлар фуқаро Юсуповга тилхат асосида топширилиб, аукционга қўйилмаган бинолар ва мол-мулклар ва чорва моллари тегишли тартибда олиб чиқиб кетилиши унга тушунтирилган.

Бироқ Юсупов аукцион савдосига қўйилмаган ва ғолиблик баённомасига киритилмаган фуқаро Эргашев томонидан ижара асосида қурилган ҳамда фойдаланиб келинаётган қиймати 300 миллион сўмлик тайёр ҳолдаги иссиқхона биносини бузиб кетиб, ундан чиққан қувур ҳамда арматура маҳсулотларини ўзбошимчалик билан Наманган шаҳрида темир савдоси билан шуғулланувчи фуқаро Турғунбоевга 170 миллион сўмга сотиб юборган. Бу билан Юсуповнинг ҳаракатида сотиб олинган бино ва иншоотларда тадбиркорлик фаолиятини ривожлантириш эмас, балки мавжуд биноларни бузиб кетиш ва талон- торож қилиш ҳолатлари кузатилган.

Шунингдек, Юсупов ўзига тегишли бўлмаган бино ва иншоотлар белгиланган тартибда топширилмаганлиги, унга ҳар хил тўсиқлар ва тазйиқлар ўтказилаётганлиги, қўли уриб синдирилганлиги, Наманган шаҳридаги хонадонига ўт қўйилганлиги, унинг қоровули Тошбоевни урушганлиги, натижада у вафот этганлигидаги важлари билан ижтимоий тармоқларда асоссиз чиқишлар қилиб келмоқда.

Унинг важлари асоссиз ва туҳматдан иборат эканлиги дастлабки тергов давомида тўлиқ ўз тасдиғини топди. Бундан ташқари Юсуповга 2019 йил 9, 12, 16 октябрь кунлари тергов органларига келиши тўғрисидаги чақирув хатлари берилган бўлса-да, тергов органларига келишдан асоссиз бош тортган. Юсуповни 15 октябрдаги мажбурий келтириш ҳақидаги қарор бўйича ҳам терговга олиб келиш имкони бўлмаган, шундан сўнг Юсуповни қаерда эканлигини аниқлаш бўйича олиб борилган тезкор суруштирув ҳаракатлари давомида уни Тошкент шаҳри Миробод туманида юрганлиги ҳақида тезкор маълумот олиниб, 21 октябрь куни Миробод тумани ички ишлар бўлимига Юсуповни Андижон вилоят прокуратурасига мажбурий келтириш ҳақида қарор юборилган ва қарор ижроси таъминланиб, 22 октябрь куни Андижон вилоят прокуратураси тергов органига олиб келинган.

Жорий йилнинг 22 октябрь куни Юсупов Жиноят кодексининг 167-моддаси 3-қисми «А» банди, 168-моддаси 4-қисми «А» банди, 169-моддаси 2-қисми «А» банди, 232-моддаси 2-қисми, 233-моддаси 1-қисми, 237-моддаси, 238-моддаси 2-қисми, 139-моддаси 3-қисмида назарда тутилган жиноятларни содир этганлиги гумонланиш тариқасида ишига жалб қилиниб, Жиноят процессуал кодексининг 221-моддаси тартибида ушланган.

Бундан ташқари «Арғумон Олтинкўл» фермер хўжалиги раҳбари Ҳамрақуловга 2019 йил 10 октябрь куни жиноят кодексининг 192-моддаси, 11-моддаси 1-қисми, 233-моддаси 1-қисми билан мажбурий ижро бюроси Олтинкўл тумани бўлим бошлиғи ўринбосари лавозимида ишлаган Бектемировга шу куни жиноят кодексининг 205-моддаси 2-қисми «А » банди билан айб эълон қилиниб, уларга нисбатан гаров эҳтиёт чоралари қўлланилган. Ҳозирда жиноят иши бўйича тергов ҳаракатлари тамомланиб, судга юбориш чоралари кўрилмоқда.

Шуни алоҳида таъкидлаб ўтиш лозимки, айбланувчи Юсупов муқаддам 2014 йил жиноят ишлари бўйича Наманган вилоят судининг ҳукмига асосан айнан шу каби, яъни мусодарадаги мулк ва транспорт воситаларининг аукцион савдоси билан боғлиқ содир этган жиноятлари учун,  Жиноят кодексининг 167-моддаси 3-қисми «А» банди, 210-моддаси 3-қисми «Б» банди, 189-моддаси 3-қисми, 209-моддаси 2-қисми «А» банди, 168-моддаси 1-қисми, 227-моддаси 2-қисми «А» бандлари билан айбли деб топилиб, 11 йил муддатга озодликдан маҳрум қилинган.

Бундан ташқари, Асака туманлараро иқтисодий судининг 2019 йил 26 сентябрдаги ҳал қилув қарорига кўра Олтинкўл туманидаги ферма бино иншоотини Юсупов томонидан бузиб кетилганлиги учун 2019 йил 3 июнда ўтказилган электрон онлайн аукцион савдоси қонунга хилоф тарзда ўказилган деб топилиб, аукцион баённомаси ҳақиқий эмас деб топилган.

Ҳозирда тергов ҳаракатлари якунланиш арафасида бўлиб, «Арғумон Олтинкўл» фермер хўжалиги раҳбари Ҳамрақулов, мажбурий ижро бюроси Олтинкўл тумани бўлим бошлиғи ўринбосари лавозимида ишлаган Бектемиров ҳамда «Юксак блог инвест» МЧЖ раҳбари Юсуповларни айблаш ҳақидаги жиноят иши суд муҳокамасига юборилган.