Халқаро лойиҳа билан банд «Бибихоним» ва фронт ортидаги фронт ҳақида «Илҳақ». Жаҳонгир Аҳмедов 2-жаҳон уруши ҳақида фильм суратга олмоқда

Режиссёр Жаҳонгир Аҳмедов ҳамда продюсер Зафар Йўлдошев «Исломхўжа» тарихий, бадиий-публисистик фильмдан сўнг «Илҳақ» деб номланган тарихий фильмни суратга олмоқда.

Режиссёр Жаҳонгир Аҳмедов «Дарё» мухбири Феруз Муҳаммадга берган интервьюсида «Илҳақ» фильми ҳақида батафсил маълумот бериб, «Бибихоним» тарихий фильмининг суратга олиш ишларининг бошланмай якунлангани сабаблари ҳақида гапирди.

‘Илҳақ’ кинокартинаси устида ишлаяпмиз. Бу асарни ижодимнинг туб бурулиши дея оламан. Бунгача бунақа катта жамоа, катта ва қийин давр ҳамда катта масъулият билан ишламаганмиз.

‘Илҳақ’ фильми фронт ортидаги фронт ҳақида, бу фильм Зулфия ая ва унинг урушдан қайтмаган беш ўғлининг аянчли қисмати ҳақида.

Зулфия аянинг беш ўғли Холматов Исоқжон, Холматов Аҳмаджон, Холматов Муҳаммаджон, Холматов Ваҳобжон, Холматов Юсуфжон урушдан қайтмаган.

Муҳаммаджон 1941 йилнинг июлида, Аҳмаджон ундан бир ой кейин фронтга кетади. Кузга бориб Ваҳобжон билан Юсуфжонни ҳам кузатишади. Энг охирида, 1944 йилнинг март ойида Исоқжон ҳам жўнаб кетади.

Бирин-кетин ҳамма ўғилларидан қора хат келади. Ая айниқса кенжаси Юсуфжон учун қаттиқ куюниб ўтган экан. Чунки фақатгина Юсуфжон ҳали уйланмаган, ундан зурриёд қолмаган эди.

Қишлоқдошлардан кимнингдир боласидан қора хат келса, уни ‘сени битта боланг ўлди, қаддингни тут, ана Зулфия беш паҳлавонидан айрилиб ҳам сабр қилаяпти’, — деб бир-бирларига таскин беришаркан.

Урушдан сўнг ая келинларига ‘хоҳласанглар турмуш қилинглар’ — деган, келинлари эса рад қилишган. Жуда эрта, ёш бева қолган бўлсаларда, бир умр эрларига садоқатда, Зулфия аянинг бағрида яшаб ўтишган.

Кейинчалик Зулфия аянинг ўғилларидан фақат иккитаси ҳақида маълумот чиқди. Муҳаммаджон Холматовдан келган йўқолган ‘қора хат’ топилиб, у 1945 йил 24 февраль куни Польшанинг Вембрандава туманида ҳалок бўлгани ва ўша ерга дафн қилингани, кенжа ўғил Юсуф Холматов эса танкчилар командири бўлганлиги, Ленинград қамалини ёриб ўтиш учун бўлган жангларнинг бирида танки ёниб кетиб, оғир яраланганлиги, госпиталда вафот этганлиги маълум бўлди. Юсуф Холматов Пискарев қабристонига дафн этилган экан.

Жаҳонгир Аҳмедов, режиссёр

Режиссёр «Бибихоним» тарихий фильмининг суратга олинмаётганини қуйидагича асослади.

‘Бибихоним’ фильмида бош ролни ижро этадиган актриса ҳозирда бошқа бир халқаро лойиҳада бандлиги туфайли, фильмнинг суратга олиш ишлари тўхтаб турибди. У билан шартномамиз шартига биноан, 2020 йилнинг куз фаслидан ишлай бошлаймиз.

Жаҳонгир Аҳмедов, режиссёр

Маълумот учун, «Илҳақ» тарихий фильмининг сценарий муаллифлари Жаҳонгир Аҳмедов ҳамда Ҳасан Тошхўжаевлар томонидан ёзилган. Фильм оператор Жаҳонгир Ибрагимов, рассом Баҳриддин Шамсуддинов, либос Зуҳра Ғаниева, гримм Зилола Собирова, продюсер Зафар Йўлдошевлар томонидан суратга олинмоқда.