Шавкат Мирзиёев чорвачиликни саноат усулида ривожлантиришга кўпроқ эътибор қаратиш бўйича топшириқ берди
Президент Шавкат Мирзиёев раислигида 16 октябрь куни Ўзбекистонда чорвачилик ва боғдорчилик тармоқларини ривожлантириш бўйича устувор вазифаларга бағишланган йиғилиш ўтказилди. Йиғилишда, хусусан, Ветеринария ва чорвачиликни ривожлантириш давлат қўмитаси раиси Баҳромжон Норқобилов ҳам қатнашган.
Тадбирдан сўнг «Ўзбекистон 24» телеканалининг «Ахборот 24» информацион дастурига интервью берган Норқобиловнинг сўзларига кўра, йиғилишда Президент Шавкат Мирзиёев чорвачилик соҳасини ривожлантириш, чорвачилик маҳсулотларини ишлаб чиқариш ҳажмини кўпайтириш бўйича аниқ топшириқ ва вазифаларни белгилаб берган.
«Президент томонидан саноат усулида чорвачиликни, айниқса, гўшт йўналишидаги бўрдоқичилик корхоналарини кўпайтиришга кўпроқ эътибор бериш бўйича аниқ топшириқлар берилди. Бу борада қўмитамиз 2019 йил охиригача камида 500 бош чорвага мўлжалланган, бўрдоқичилик йўналишидаги 80 та комплексни, сутчилик йўналишида эса 70 дан зиёд мажмуани ишга туширади», — деди Баҳромжон Норқобилов.
Унинг таъкидлашича, 2020 йилда бўрдоқичилик бўйича яна 150 та, сутчилик йўналишида эса 140 та замонавий мажмуалар қурилади. Президент матбуот хизмати ахборотига кўра, Шавкат Мирзиёев мутасаддиларга 2019—2021 йилларда 300—500 бош чорва боқишга мўлжалланган 270 та бўрдоқичилик комплекси ва 260 та сутчилик корхонасини ташкил этиш ишларини жадаллаштириш бўйича топшириқ берган.
«Мажмуаларни ишга тушириб, маҳсулот ишлаб чиқариб, аҳоли дастурхонига сифати кафолатланган арзон гўшт ва сут етказиб бериш бўйича топшириқлар берилди», — дея қўшимча қилди Ветеринария ва чорвачиликни ривожлантириш давлат қўмитаси раиси Баҳромжон Норқобилов.
Фермер, деҳқон хўжаликлари ва томорқа ер эгалари кенгаши раиси Актам Ҳайитовнинг Ўзбекистонда гўшт нархи ошишига аҳолининг «кўп гўшт еяётгани» сабаб экани ҳақидаги таъкиди шов-шувларга сабаб бўлганди. Ҳайитовнинг бу гапларига жавобан эълон қилинган муносабатларнинг бирида Ўзбекистонда гўшт ҳамон «ибтидоий натурал хўжалик муҳитида» тайёрланаётгани, маҳсулот таннархи пасайиши учун у натурал ишлаб чиқаришдан саноат ишлаб чиқаришига ўтиши кераклиги уқтирилган эди.
