Ўзбекистонда гепатит C вирусига қарши «Софосбувир» дори воситасининг субстанцияси яратилди, деб хабар бермоқда Фанлар академияси матбуот хизмати.
Таъкидланишича, гепатит C вируси билан зарарланган беморларни даволашда қўлланиладиган Софосбувир (гепатит C вирусини даволовчи генерик препарат) дори воситаси ҳозирги кунда четдан импорт қилинмоқда.
Шу сабабли Фанлар академияси Ўсимлик моддалари кимёси институти, Хитой Фанлар академияси Шинжон физика ва кимё техника институти ҳамда Шанхай тиббий материаллар институти олимлари ҳамкорлигида «Софосбувир» дори воситасини ишлаб чиқариш усуллари яратилди.
Тажриба шароитларда ишлаб чиқариш амалга оширилиб олинган маҳсулот клиниколди синовлари натижалари бўйича оригинал дори воситаси — «Софосбувир»га мос келишини кўрсатган.
Хабарда қайд этилишича, яратилган усул асосида технологик жараёнлар схемаси ишлаб чиқилиб, экспериментал технологик линияси яратилди ва илк бор Ўзбекистон ҳудудида «Софосбувир» дори воситасининг субстанцияси ишлаб чиқарилди.
Шунингдек, тегишли барча ҳужжатлар Соғлиқни сақлаш вазирлиги қошидаги Фармацевтикани ривожлантириш агентлигига топширилиб ижобий хулоса олингани ва бугунги кунда клиник синовларни амалга ошириш бўйича тайёргарликлар кўрилаётгани айтилган.
Изоҳ (0)