Ўтган ҳафтадан бошлаб Ашхободдаги давлат дўконларининг аксариятида сотувчиларнинг болаларга маҳсулот сотиши тақиқлаб қўйилди.
Аввал давлат дўконларида чекланган маҳсулотлар савдоси вақтида кўп болали ота-оналар фарзандларини ҳам навбатга қўйиб улар ёрдамида кўпроқ нон, тухум ҳамда ун сотиб олаётганди.
Энди мактаб ёшидаги болаларни ҳам «Баракотли» бозоридан ҳайдаб чиқариш ҳолатлари кузатилмоқда. Сотувчилар ушбу ҳолатни ўқувчилар дўконларда навбатда туриб мактабдан, ўқишдан қолиб кетаётганлиги билан изоҳлаган.
«Болалар мактабга кеч қолишмайди, чунки тухум савдоси тонгги соат 6:00 да ёки ундан сал кечроқ бошланади. Бу сотувчилар давлат нархида камроқ тухум сотиши ва ортиб қолган маҳсулотларни хусусий дўконларга икки баравар қимматга пуллаши учун тўқилаётган баҳона», — дейди олти нафар фарзандни ўстираётган ёлғиз она.
Туркманистонда ун, тухум ва нон танқис бўлиб қолгани сабабли давлат дўконларида ушбу маҳсулотлар чекланган миқдорда сотилмоқда. Шу сабабли Ашхободда ва мамлакатнинг бошқа шаҳарларида ушбу товарларга нисбатан инқироз кузатилмоқда.
Изоҳ (0)