Турли мамлакатларнинг политологлар гуруҳи Қозоғистон президенти Қосим-Жўмарт Тўқаев, мамлакатнинг биринчи президенти Нурсултон Назарбоев, Россия давлат раҳбари Владимир Путин ҳамда Хитой халқ республикаси раиси Си Цзиньпинга қозоғистонлик хитойшунос олим Константин Сироежкин иши юзасидан Владимир Парамановнинг Facebook’даги «Централная Азия» гуруҳида мурожаат йўллади.
Ушбу мурожаат остидаги имзолар сони 80 тадан ошган. Ҳужжатда Сироежкиннинг дунё миқёсидаги профессионал олим экани, ўз ватанини севиши, Қозоғистон, Ўрта Осиё ва Россиянинг Хитой ҳамда бошқа давлатлар билан муносабатларига ўзининг улкан ҳиссасини қўшганлиги қайд этилган.
«Биз суднинг анчайин қаттиққўллик билан адолатсиз қарор чиқарганидан хавотирга тушдик, К.Л.Сироежкиннинг соғлиғи билан боғлиқ муаммолари ҳам борлиги хавотиримизни янада оширмоқда. Шуларни ва бошқа жиҳатларни инобатга олган ҳолда сизлардан ўз қудратингиз ва обрўйингизни ишга солиб, олимнинг оқланиши ҳамда озод этилишини, шунингдек, жиддий реабилитация жараёнида иштирок этиши ва илмий фаолиятига қайтишида ёрдам беришингизни сўраймиз», — дейди мурожаат муаллифлари.
Сироежкин 7 октябрда давлатга хиёнат қилганликда айбдор деб топилган ва 10 йилга озодликдан маҳрум қилинган ҳамда Қозоғистон фуқаролигидан ҳам маҳрум бўлганди.
Изоҳ (0)