«Ўзбекконцерт» давлат муассасасида 16 октябрь куни шошилинч брифинг ўтказилди. Йиғилишда хонандалар Жаҳонгир Отажонов, Шаҳло Аҳмедова, Абдулла Қурбонов ва қизиқчи Ҳалима Ибрагимованинг лицензияси қайтариб берилгани маълум қилинди. Бу ҳақда журналист Феруз Муҳаммад хабар берди.

Фото: «Дарё»

Брифингни муассаса раҳбари Одилжон Абдуқаҳҳоров ўтказиб, Жаҳонгир Отажонов, Шаҳло Аҳмедова, Абдулла Қурбонов ва қизиқчи Ҳалима Ибрагимованинг лицензияси қайтарилганини айтган. Хонандалар ва қизиқчининг лицензияси нима сабабдан қайтариб берилганига ойдинлик киритилмаган.

«Ўзбекконцерт» ходимининг маълум қилишича, «Дарё»да 15 октябрь, сешанба куни 2019 йилда огоҳлантирилган ва лицензияси олинган жамоа ва хонандалар ҳақида эълон қилинган мақола айрим тушунарсиз ҳолатларга ойдинлик киритиш учун асос бўлган.

«Ўзбекконцерт» давлат муассасаси томонидан 14 октябрдан эътиборан Жаҳонгир Отажоновнинг лицензияси тугатилган эди.

«Сўнгги вақтларда Жаҳонгир Отажонов ана шундай масъулиятни бироз унутиб қўйди, десак хато бўлмайди. Жорий йилнинг май ойи, яъни муборак Рамазон ойида ижтимоий тармоқларда хонанда Жаҳонгир Отажонов томонидан санъаткор одобига, миллий урф-одатларимиз ва одоб-ахлоқ қоидаларига тўғри келмайдиган номуносиб ҳаракатлар кузатилганди. Бу шунчаки ўзини кўз-кўз қилиш мақсадидами ёки бошқа мақсаддами, барибир ижтимоий тармоқлардаги бундай кўриниш ёшлар орасида, жамоатчилик ўртасида санъат аҳли тўғрисида салбий фикр уйғотмасдан қолмаган эди», — дея изоҳлаган эди «Ўзбекконцерт» ушбу ҳолатни.

«Ўзбекконцерт»нинг ушбу ҳаракати Жаҳонгир Отажоновнинг мухлислари томонидан кескин қораланиб, ижтимоий тармоқларда жамоатчилик томонидан хонандани қўллаб-қувватлаш бошланган эди.

Бугун Жаҳонгир Отажонов мухлисларига видеомурожаат йўллаб, барча қўллаб-қувватлаганларга миннатдорчилик билдирди.