Тошкентда ўз ишини бошлаган Ўзбекистон педиатрларнинг 8-сездида Россия, АҚШ, Германия, Италия, Литва, Туркия, Болгария, Қирғизистон, Тожикистон ва бошқа мамлакатлардан 60 дан ортиқ олим, етакчи мутахассис ва шифокорлар иштирок этмоқда. Бу ҳақда Соғлиқни сақлаш вазирлиги жамоатчилик билан алоқалар бўлими хабар берди.
Соғлиқни сақлаш вазири Алишер Шодмоновга кўра, болаларга педиатрия соҳасида ихтисослаштирилган тиббий хизмат кўрсатиш учун Республика ихтисослаштирилган педиатрия илмий-амалий тиббиёт маркази билан бир қаторда перинатал, скрининг, аҳоли репродуктив саломатлик марказлари ва унинг қуйи тизимлари ҳам ташкил этилди.
«Эндиликда қишлоқ оилавий поликлиникаларида умумий амалиёт шифокорлари қаторида педиатр, терапевт, гинеколог, стоматолог ва УТТ шифокори каби тор мутахассислар тиббий хизмат кўрсатмоқда», — дейилади хабарда.
Маълум қилинишича охирги икки ярим йилда 150 дан ортиқ мутахассис Россия, АҚШ, Германия, Италия, Япония, Австрия, Жанубий Корея, Хитой, Болгария, Словакия, Чехия, Туркия, Беларусь, Украина университет ва клиникаларида малака оширган.
Шунингдек, сўнгги уч йилда гўдаклар ўлими 11,4 промиллдан 9,9 промиллга камайган.
Қўшимча қилинишича, тадбирда болаларга тиббий ёрдам кўрсатиш, касалликлар профилактикаси, ташхислаш ва замонавий даволаш усулларини амалиётга кенг қўллаш бўйича ўзаро мулоқотлар бўлиб ўтмоқда.
Изоҳ (0)