Toshkentda o‘z ishini boshlagan O‘zbekiston pediatrlarning 8-syezdida Rossiya, AQSh, Germaniya, Italiya, Litva, Turkiya, Bolgariya, Qirg‘iziston, Tojikiston va boshqa mamlakatlardan 60 dan ortiq olim, yetakchi mutaxassis va shifokorlar ishtirok etmoqda. Bu haqda Sog‘liqni saqlash vazirligi jamoatchilik bilan aloqalar bo‘limi xabar berdi.
Sog‘liqni saqlash vaziri Alisher Shodmonovga ko‘ra, bolalarga pediatriya sohasida ixtisoslashtirilgan tibbiy xizmat ko‘rsatish uchun Respublika ixtisoslashtirilgan pediatriya ilmiy-amaliy tibbiyot markazi bilan bir qatorda perinatal, skrining, aholi reproduktiv salomatlik markazlari va uning quyi tizimlari ham tashkil etildi.
“Endilikda qishloq oilaviy poliklinikalarida umumiy amaliyot shifokorlari qatorida pediatr, terapevt, ginekolog, stomatolog va UTT shifokori kabi tor mutaxassislar tibbiy xizmat ko‘rsatmoqda”, — deyiladi xabarda.
Ma’lum qilinishicha oxirgi ikki yarim yilda 150 dan ortiq mutaxassis Rossiya, AQSh, Germaniya, Italiya, Yaponiya, Avstriya, Janubiy Koreya, Xitoy, Bolgariya, Slovakiya, Chexiya, Turkiya, Belarus, Ukraina universitet va klinikalarida malaka oshirgan.
Shuningdek, so‘nggi uch yilda go‘daklar o‘limi 11,4 promilldan 9,9 promillga kamaygan.
Qo‘shimcha qilinishicha, tadbirda bolalarga tibbiy yordam ko‘rsatish, kasalliklar profilaktikasi, tashxislash va zamonaviy davolash usullarini amaliyotga keng qo‘llash bo‘yicha o‘zaro muloqotlar bo‘lib o‘tmoqda.
Izoh (0)