Ўзбекистонда илк марта буюк саркарда Амир Темур ҳаёти ҳақида ҳикоя қилувчи голограмма театр томошаси саҳналаштирилди. Лойиҳа ижодкорларининг маълум қилишича, томошани саҳналаштириш учун икки йил меҳнат қилинган. Бу ҳақда Тошкент шаҳар ҳокимлиги матбуот хизмати хабар бермоқда.

Фото: Тошкент шаҳар ҳокимлиги матбуот хизмати

Голограмма услубида саҳналаштирилган томошалар жаҳон киносаноатида анча оммалашган. Ушбу услубдаги саҳна кўринишларида ҳамма образни бир нафар актёр ижро этади.

Марказий Осиёда илк маротаба саҳналаштирилган голограмма спектаклида Амир Темур образини актёр Раҳимжон Дусанов гавдалантирмоқда. 15 дақиқа давом этадиган спектакл келгуси уч ой давомида пойтахтдаги Ёшлар ижод саройида намойиш этилади. Саҳна кўринишида ҳар бир сония ҳисобга олинган, шунинг учун ўта қизиқувчан томошабин ҳам ҳақиқий актёрни компьютер графикасидан фарқлай олмайди, дейилади хабарда.