Норвегиядаги талаба Амалия Маркота Андерсен «Дариус» лақабли каламушни боқарди. Андерсен анимация ва рақамли санъатларни ўрганаётгани туфайли ўз уй ҳайвонида ҳам санъатга муҳаббат уйғотишга қарор қилди. У Дариусга акварелда расм чизишни ўргатди, дея ёзади Meduza.

Фото: Reddit

«Мен хавфсиз акварел тўпламини олдим, у ерга каламушнинг кичик панжаларини ботириб, уни оқ қоғозга қўйиб юбордим. Бу жараён қандайдир тасвир вужудга келмагунича давом этарди», — деб ҳикоя қилади Амалия Андерсон.

Дариус қойилмақом абстракт асарлар яратди. Ҳар бир картинанинг чизилишига тахминан 10 дақиқа вақт сарфланарди. Амалия Дариус чизган уч ёки тўртта акварель асарни сотишга ҳам улгурган. Сотувдан тушган пуллар эвазига каламушни кўчада сайр қилдириш учун тасма сотиб олган.

Фото: Meduza

Аммо Дариусга ҳам бошқа рассомлар каби ўлганидан кейингина машҳурлик насиб этди. Каламуш рассом 2019 йил бошида ўлган бўлса, у чизган суратлар Twitter’да постлар қўйила бошланганидан кейин сентябрь ойида танила бошлади. Дариусга қизиқиш ортгач, одамлар ёдига унинг эгаси Андерсен Tumblr’да аккаунт очгани ва каламуши ҳақида ёзганлари тушиб қолди.

«У ҳаётимда оғир дамлар кузатилаётган бир даврда кириб келди, ўша вақтда яшашдан мақсадим нималиги ва ўзлигимни излаётгандим. У зулмат оламимдаги ёрқин нур эди. <…> Мен шу кичик мавжудот ҳаётимга киритган ўзгаришлар учун ундан миннатдорман. У кичик суратлари билан нафақат менинг, балки уни яхши кўриб қолган минглаб мухлисларининг ҳаётига қувонч улашди» — дея кичик дўстини хотирлаган Андерсон.

Фото: Meduza

Андерсен уйида яна иккита каламуш боқади, лекин улар акварелда расмлар чизмайди.