«Розетта» аппарати Чурюмов–Герасименко кометасида харсангтошларнинг юмалаётганини суратга олди

«Розетта» космик аппарати 67P/Чурюмов–Герасименко кометасида баландликдан қулаган ва юмалаб пастга кетган харсангтошларни суратга олди. Таъкидлаш жоизки, харсангтошнинг юмалаши кометанинг 2014 ва 2016 йиллар орасида олинган суратларини текшириш асносида кўриб қолинган. Икки йил давомида «Розетта» кометанинг Қуёшга яқинлашгани сайин сиртида қандай ўзгаришлар содир бўлишини тасвирга тушириб борган.

«Розетта»нинг миссияси уч йил муқаддам тамом бўлган бўлса-да, у жўнатган материалларни ўрганиш учун ҳали анча кўп вақт – бир неча ўн йиллар керак. Хусусан, унинг бортига ўрнатилган биргина OSIRIS камерасининг ўзи 76 минг сурат юборган. Унда кометанинг Қуёшда яқин боргани сари қандай ўзгаришларга дучор бўлган муҳрланган. Хусусан, Қуёшнинг комета сиртини қиздириши кучайгани сайин унинг сиртидаги муз эриши, чанг кўтарилиши ва қаъридан газлар чиқиб кела бошлаши суратларда акс этган. Ушбу моддалар жамланиб, атроф-коинотга сочила бошлаши, яъни кометанинг думига айланишини «Розетта» юборган суратлар орқали хронологик тартибда кўриш мумкин.

Шунингдек, ўша суратларни текшириш асносида астрономлар комета сиртидаги тепаликлардан харсангтошларнинг пастга қулаши ва ўзидан из қолдириб юмалашига гувоҳ бўлди. Гарчи кометанинг тортиш кучи Ерникидан ўн минг марта суст бўлса-да, бироқ бу тортишиш йирик харсангларни тутиб туришга етарли бўлмоқда экан.

Масалан, кометанинг «бўйни» ҳисобланадиган тор ингичка қисмидаги тахминан 50 метрлик баландликдан ўн метрча келадиган харсанг пастга қулаган ва қум текислиги бўйлаб из қолдириб, анча жойгача юмалаб борган. Тахминларга кўра, ўша харсангнинг массаси 230 тонна атрофида бўлиши мумкин экан.

Бундай харсангларнинг юмалашини текшириш асосида олимлар 67P кометасининг тузилиш структурасини яхшироқ аниқлаши мумкин бўлди. Хусусан, маълум бўлишича, ўша харсанг оддий қорпарчасидан 100 марта мўртроқ экан. Демакки, кометанинг ўзи ҳам анча мўрт моддадан тузилган бўлиши мумкин. «Розетта» миссиясини бошқарган олимлардан бири Жан-Батист Винсеннинг сўзларига кўра, комета сиртидаги айнан шундай фаоллик, яъни тошларнинг қулаши унга яқинроқ боришга имкон бермаган. Ҳар доим қулаётган харсанг унга яқин келиб турган космик аппаратни шикастлаб қўйиши хавфи бўлган учун «Розетта» кометага нисбатан масофа сақлашга мажбур бўлган.