АИТБ «Ипак Йўли» ва Европа тикланиш ва тараққиёт банки ўртасида имзоланган шартнома Ўзбекистондаги кичик корхоналарга яшил иқтисодиётни молиялаштириш механизмига (GEFF) йўл очиб, энергия самарадорлигини ва қайта тикланадиган энергия манбаларига сармоя киритиш имкониятини яратди.
Ушбу механизм кичик ва хусусий корхоналарга энергия сарфи, иссиқхона газлари чиқиндиларини камайтиришга мўлжалланган технологияларни, шунингдек, иқлим ўзгаришига мослашиш ва унинг таъсирини камайтира оладиган технологияларни молиялаштириш учун кредитлар ажратади.
«Ипак Йўли» банки GEFF доирасида ЕТТБнинг биринчи шерик банкига айланди ҳамда хусусий компанияларга кредит ажратиш учун ўзбек сўми эквивалентида 5 миллион АҚШ долларига тенг кредит линиясини жалб қилди. Кредитлар энергия тежайдиган ускуналар, иссиқлик изоляцияси, фотоэлектрик қуёш панеллари, геотермал иссиқлик насослари ва сувни тежайдиган суғориш тизимлари каби яшил технологияларга инвестицияларни ўз ичига олади.
Ушбу кредит линияси доирасида лойиҳа ташаббускорларига энергия самардорлиги соҳасидаги халқаро экспертларнинг бепул маслаҳатлари тақдим этилади, бу эса «Ипак Йўли» банки мижозларига ўз корхоналарида илғор халқаро тажрибани жорий этишга имкон беради.
Шуни ҳам таъкидлаш лозимки, ЕТТБ кредит линиясининг асосий афзалликларидан бири муваффақиятли амалга оширилган лойиҳаларнинг ташаббускорларига мақбул лойиҳанинг кредит миқдорининг 10 дан 20% гача грант маблағлари берилиши.
Реклама ҳуқуқи асосида.
Изоҳ (0)