АҚШ президенти Дональд Трамп «Толибон» ҳаракатининг жангариларига қарши зарбалар беришни давом эттиради. Бу ҳақда у 11 сентябрь қурбонларини ёд этиш маросимида маълум қилди, деб хабар беради «Коммерсантъ».
Фото: Reuters
«Сўнгги тўрт кун ичида душманларимизга нисбатан ҳар доимгидан ҳам қаттиқроқ турдик. Ва ушбу ҳаракатлар давом этади», — дейди Трамп.
Аввалроқ, Дональд Трамп АҚШ ва «Толибон» ўртасидаги тинчлик музокаралари якунлангани ҳақида маълум қилганди. Бунга «Толибон» жангариларининг Кобул марказида содир этган ҳужуми сабаб бўлган. Ҳужум оқибатида 12 киши, жумладан, америкалик аскар ҳам ҳалок бўлган эди.
«Бир неча кун олдин тинчлик музокараларини ўтказишни режалаштирган эди. Улар Пуэрто-Рикодан бўлган ажойиб америкалик аскар ва яна 11 нафар бегуноҳ инсонни ўлдирганидан сўнг, музокарани бекор қилдим. Улар ушбу ҳужум орқали ўз кучини кўрсатиб қўймоқчи бўлди, лекин амалда нақадар заиф эканликлари билиниб қолди», — дейди АҚШ президенти.
