АҚШ президенти Дональд Трамп Эрон президенти Ҳасан Руҳоний билан дастлабки шартларсиз учрашишга тайёр. Бу ҳақда АҚШ молия вазири Стивен Мнучин давлат котиби Майкл Помпео билан биргаликда ўтказилган брифингда маълум қилди, деб хабар беради «РБК».
Фото: BBC
Мнучиннинг таъкидлашича, АҚШ бундан кейин ҳам Теҳронга нисбатан тўлиқ босим ўтказиш сиёсатини ёқлаб қолади. «Энди президент ҳеч қандай дастлабки шартларсиз учрашувга тайёр эканлигига шаъма қилди, бироқ биз максимал босим кампаниясини қўллаб-қувватлайверамиз», — дейди молия вазири.
АҚШ ва Эрон муносабатлари 2018 йилнинг майида, Трамп биргаликдаги кенг қамровли ҳаракатлар режасидан чиқишини маълум қилганидан сўнг кескинлашганди. АҚШнинг келишувдан чиқиши Эронга қарши бир қатор санкцияларнинг қайта тикланишига олиб келганди.
2019 йилда Теҳрон битимнинг ядровий реакторларда фойдаланиладиган бойитилган уран ва оғир сув захираларини чеклашга оид алоҳида шартларини бажаришдан бош тортган эди. 6 сентябрь куни Эрон ядровий дастур бўйича мажбуриятини учинчи бор қисқартирди.
Сентябрь ойи бошида Эрон агарда 15 миллиард АҚШ доллари миқдорида кредит ажратилса ва ўз нефтини Европада сотишга рухсат берилса, битим шартларига риоя қилишга тайёрлигини билдирганди.
