АҚШ молия вазири Стивен Мнучин ва давлат котиби Майкл Помпео ИШИД, «Ҳизбуллоҳ», ҲАМАС, шунингдек, Эрон ислом инқилоби қўриқчилар корпуси вакилларига нисбатан янги санкциялар жорий этилганини маълум қилди, деб хабар беради «Коммерсантъ».
«Президент АҚШнинг глобал терроризмга қарши курашда ҳал қилувчи куч эканлигини билдириб қўйиш мақсадида янги фармонни имзолади. Молия вазирлиги янги воситалар ёрдамида террорчилик гуруҳларига алоқадор 15 нафар жисмоний ва юридик шахсларга нисбатан санкция жорий этди», — дейди Мнучин.
Тегишли фармон Оқ уй сайтида эълон қилинган. Дональд Трамп администрациясидан келган хабарда янги санкциялар террорчиларга қарши курашни кучайтиришга, шунингдек, уларнинг молиявий аҳволи ва шерикларига қарши қаратилгани таъкидланган.
«Президент Трампнинг Эронга қарши кампанияси радикал тузумнинг террорни ёйиш ва бузғунчиликни қўзғатиш учун фойдаланадиган воситаларини сезиларли даражада камайтиради. Янги санкциялар Эрон ислом инқилоби қўриқчилари Корпуси ва уларнинг ишончли вакиллари, шу жумладан ‘Ҳизбуллоҳ’ ва ҲАМАСни молиялаштиришни сезиларли даражада камайтирди», — дейилади баёнотда.
Шу билан бирга, Майкл Помпео Дональд Трамп Эрон етакчиси Ҳасан Руҳоний билан БМТнинг сентябрь ойи охирида бўлиб ўтадиган йиғилишида учрашишга тайёр эканлигини маълум қилган.
Изоҳ (0)