Президент Дональд Трамп бошчилигидаги АҚШ администрациясининг ташқи савдо сиёсатидаги ноаниқлик Хитой билан содир бўлаётган савдо урушида кўзга ташланиб, жаҳон иқтисодиётида катта йўқотишларга олиб келмоқда, деб хабар беради Reuters.
2020 йилнинг бошида етказиладиган зарар жаҳон ЯИМнинг бир фоизини ташкил этиши мумкин.
Ҳозирги кунда жаҳон ЯИМ 85 триллион долларни ташкил этади ва унинг 20 триллиони АҚШ ҳисобига тўғри келади. Шу сабаб Трампнинг ҳаракатлари оқибатида АҚШ 200 миллиард доллар йўқотиши, бутун дунё эса 850 миллиард доллардан айрилиши мумкин.
АҚШ Федерал резерв тизими экспертлари ОАВда эълон қилинган сўнгги хабарларни таҳлил қилиб, сўнгги марта бу каби ноаниқлик 1970 йилларда содир бўлганини аниқлади. Келажакка бўлган ишончнинг йўқлиги ишлаб чиқарувчиларнинг иш суръатини пасайишига, сармоядорларнинг эса ўз маблағларини таваккал қилмаслигига олиб келади.
Таҳлилчиларнинг фикрича, вазиятнинг бу каби тус олишига, асосан, Трампнинг кутилмаган ҳаракатлари сабаб бўлган. У ўз қарорларини ҳеч ким билан маслаҳатлашмасдан, ҳиссиётларга берилиб қабул қилади. Масалан, Хитой импорт маҳсулотларига нисбатан 300 миллиард доллар миқдорида бож жорий этилганида содир бўлди. Пекин Америка импортига нисбатан ўзининг 75 миллиард долларлик чеклов чораларини эълон қилди. АҚШ эса келажакда бож солиғини ўндан 15 фоизга кўтаришини билдирди. Манбаларнинг таъкидлашича, Трампни божларни оширмасликка аранг кўндиришган.
Изоҳ (0)