Дональд Трамп Флоридага яқинлашиб келаётган «Дориан» бўрони сабаб Польшага сафарини бекор қилди. Бу ҳақда АҚШ президенти журналистларга Оқ уйда маълум қилди, дея хабар бермоқда CНН.

Getty Images

«Мен учун шу ерда бўлиш муҳим. Бўрон, кўринишидан, жуда ҳам жиддий бўлиши мумкин», — деди Трамп.

Унинг маълум қилишича, у ўз ташрифини бекор қилгани ҳақида Польша президенти Анжей Дудани огоҳлантирган. Трампнинг сўзларига кўра, унинг ўрнига Польшага вице-президент Майкл Пенс боради.

Дональд Трамп Польшага 1 сентябрь куни, Иккинчи Жаҳон уруши бошланишининг 80 йиллигига бағишланган тадбирларда иштирок этиш учун ташриф буюриши керак эди.

Қайд этиш жоиз, ушбу тадбирларга Россия президенти Владимир Путин таклиф қилинмаган. Польша бош вазири ўринбосари Яцек Сасиннинг сўзларига кўра, Путиннинг ушбу тадбирларда меҳмон бўлиши мақсадга мувофиқ эмас, чунки Россия «қўшниларига нисбатан қуролли тажовузни қўллайдиган мамлакатдир».

«Дориан» бўрони яқинлашиб келаётгани муносабати билан Флоридада фавқулодда ҳолат тартиби жорий этилган. Бўрон штатнинг шарқий соҳилларига 2 сентябрь куни ёпирилади. У минтақада 1992 йилдан бери кузатилган энг кучли бўрон бўлиши кутилмоқда.