2019/2020-ўқув йилида умумтаълим мактабларида ўқувчи-ёшларнинг ижтимоий-сиёсий ва ҳуқуқий билимларини мустаҳкамлаш, уларнинг интеллектуал салоҳиятини янада ривожлантириш мақсадида «Заковат» интеллектуал ўйини янги форматда ташкил қилинади, дея хабар беради Халқ таълими вазирлиги ахборот хизмати.
Халқ таълими вазирлиги ҳамда «Заковат» интеллектуал ўйини муаллифи Абдурасул Абдуллаев ҳамкорлигида мазкур ўйин замонавий ахборот-коммуникация тараққиётини инобатга олган ҳолда янги форматда масофавий онлайн веб-турнир тарзида ташкил этилиши режалаштирилмоқда.
Лойиҳани амалиётга татбиқ этиш мақсадида Қорақалпоғистон Республикаси, вилоятлар, Тошкент шаҳрида (ҳар бир ҳудудда биттадан) жами 14 та умумтаълим мактаби «Заковат» клуби фаолиятини такомиллаштириш ҳамда ривожлантириш учун марказлашган тўгаракларни ташкил қилиш бўйича таянч мактаби сифатида белгиланди. Жорий йилнинг 27—28 август кунлари таянч мактаблари масъул ходим ва ўқувчилари иштирокида «Заковат» интеллектуал ўйинини янги форматда ташкил этиш бўйича лойиҳа муҳокамаси ва ўқув-семинари ўтказилди. Янги формат клублар фаолиятини ривожлантириш учун мақбул ечим сифатида эътироф этилди.
Ўқув-семинар доирасида «Заковат» клублари фаолиятини такомиллаштириш ҳамда ривожлантириш, марказлашган тўгаракларни ташкил қилиш бўйича таянч мактаблари жамоалари ўртасида «Заковат» интеллектуал ўйинининг республика мусобақаси ҳам ташкил этилди.
Мусобақа натижаларига кўра:
1-ўринни Самарқанд вилояти, Тайлоқ тумани 20-сонли умумтаълим мактаби жамоаси;
2-ўринни Сирдарё вилояти, Гулистон шаҳар Хорижий тилларга ихтисослаштирилган давлат умумтаълим мактаб-интернати жамоаси;
3-ўринни Қашқадарё вилояти, Абдулла Орипов номидаги ихтисослаштирилган давлат умумтаълим мактаб-интернати жамоаси қўлга киритди.
Ғолиб жамоалар Халқ таълими вазирлиги томонидан компьютер жамланмаси, телевизор ва эсдалик совғалари билан тақдирланди.
«Заковат» интеллектуал ўйини янги форматда масофадан туриб марказлашган ҳолда махсус сайт орқали онлайн режимида ўтказилади.
Лойиҳа 2020 йилдан бошлаб барча умумтаълим мактабларида татбиқ этилади.
Унга қадар «Заковат» клублари фаолиятини такомиллаштириш ҳамда ривожлантириш бўйича марказлашган тўгаракларни ташкил қилиш бўйича таянч мактабларида лойиҳа синовдан ўтказилади.
Изоҳ (0)