«Шарқ тароналари» ўн иккинчи халқаро мусиқа фестивали арафасида Самарқанд шаҳрида Ўзбекистон халқ ҳофизи, машҳур бастакор ва созанда Ҳожи Абдулазиз Абдурасулов уй-музейи очилди.

Фото: ЎзА

Ҳожи Абдулазиз Абдурасулов 1852—1936 йилларда Самарқандда яшаб, ижод қилган таниқли бастакор, ўзбек мақом санъати ривожига беқиёс ҳисса қўшган бетакрор овоз соҳиби бўлган. У яратган «Гулузорим», «Гуллар боғи», «Бебоқча» «Бозургоний», «Самарқанд ушшоғи» каби юзлаб қўшиқлар ўзбек мумтоз мусиқа меросининг энг ноёб асарлари қаторидан жой олган.

Шашмақомни ўрганиш ва кенг тарғиб этишда Ҳожи Абдулазиз Абдурасуловнинг хизматлари катта бўлган. Самарқанд мақом йўллари, соз чалиш ва ашула айтиш бўйича кўплаб ёшларга устозлик қилган, уларга ўз санъатини ўргатган. Жумладан, Ўзбекистон халқ артисти Юнус Ражабий ҳам унинг Самарқанддаги хонадонида яшаб, ҳофиздан сабоқ олган.

Фото: Самарқанд вилояти ҳокими

Аммо ана шу табаррук хонадон, кўплаб санъат дарғалари қадами етган ҳовли йиллар давомида эътибордан четда қолди.

Фото: ЎзА

Жорий йил май ойида Самарқанд вилояти ҳокими ва жамоатчилик вакиллари Регистон майдони яқинида Ҳожи Абдулазиз Абдурасулов туғилиб, ўсган, ижод қилган уйга келиб, ушбу ҳовлини ижодкорнинг уй-музейига айлантиришга қарор қилган эди.

Фото: ЎзА

Шу пайтгача шахсий хонадон сифатида фойдаланилаётган уйни эгаси (бу инсон ҳам улуғ бастакорнинг яқинларидан бири)дан сотиб олиб, капитал таъмирлаш ва «Шарқ тароналари» фестивали арафасида фойдаланишга топшириш, бу ерга санъаткор томонидан фойдаланилган ашёлар, мусиқа асбоблари, китобларни жойлаштириш бўйича мутасаддиларга топшириқлар берилганди.

Фото: Самарқанд вилояти ҳокими

Орадан уч ой ўтди. Бу ерда бир миллиард сўмдан ортиқ маблағ сарфланиб, қисқа фурсатда кенг кўламдаги қурилиш-таъмирлаш, ободонлаштириш ишлари амалга оширилди. Фестиваль арафасида уй-музейнинг очилиш маросими бўлиб ўтди.