2017—2018 йиллар давомида «Ёш китобхон» танлови доирасида жами 970 минг нафар ёш қамраб олинган бўлса, жорий йилда танловга бўлган қизиқиш янада ортиб, саралаш босқичида иштирок этган ёшлар сони 1,2 миллиондан ошиб кетди. Бу ҳақда «Дарё»га Ёшлар медиа маркази маълум қилди.

Фото: Ёшлар медиа маркази

Китобхонлик танловлари ёш оилалар ўртасида ҳам ўтказилмоқда. «Энг яхши китобхон оила» танлови илк маротаба Сирдарёда бўлиб ўтди. Унда ёш оила вакиллари Президент совғаси — Spark машинаси совриндори бўлди.

Фото: Ёшлар медиа маркази

Китобхонлик бўйича беллашувлар ҳарбийлар ўртасида ҳам давом этяпти. «Темур тузуклари билимдони» танлови куч тузилмаларидаги ёш ҳарбий хизматчиларнинг маънавий савияси ва интеллектуал салоҳиятини юксалтиришда муҳим вазифани бажармоқда. Август ойи давомида барча ҳудудларда ушбу танловнинг ҳудудий босқичи якунланиб, сентябрь ойида республика босқичи бўлиб ўтади.

Фото: Ёшлар медиа маркази

«Ёшлар кутубхонаси» рукни остида чоп этилаётган китоблар ўқилиши шарт бўлган энг муҳим билим манбалари бўла олади. Ўтган йили ушбу рукн остида 47 номдаги 470 минг дона бадиий адабиёт чоп этилиб, республикадаги барча таълим муассасаларининг кутубхоналарига етказиб берилган эди.

Фото: Ёшлар медиа маркази

Жорий ўқув йили арафасида ҳам анъана давом эттирилиб, яна 12 номдаги 120 минг дона ўзбек ва жаҳон адабиётининг энг сара асари чоп этилди. Ҳозирда улар мустақиллик байрами совғаси сифатида республика бўйлаб барча таълим муассасаларига етказиб берилмоқда.

Фото: Ёшлар медиа маркази

Бундан ташқари, «Маърифат карвони» лойиҳаси доирасида Наманган вилоятига 25 минг, Тошкент вилояти Бўка туманига 13 минг, Тошкент шаҳрининг Учтепа туманига 10 минг, Қуйи Чирчиқ туманига 1,5 минг китоб етказиб берилди.