2017—2018-yillar davomida “Yosh kitobxon” tanlovi doirasida jami 970 ming nafar yosh qamrab olingan bo‘lsa, joriy yilda tanlovga bo‘lgan qiziqish yanada ortib, saralash bosqichida ishtirok etgan yoshlar soni 1,2 milliondan oshib ketdi. Bu haqda “Daryo”ga Yoshlar media markazi ma’lum qildi.
Kitobxonlik tanlovlari yosh oilalar o‘rtasida ham o‘tkazilmoqda. “Eng yaxshi kitobxon oila” tanlovi ilk marotaba Sirdaryoda bo‘lib o‘tdi. Unda yosh oila vakillari Prezident sovg‘asi — Spark mashinasi sovrindori bo‘ldi.
Kitobxonlik bo‘yicha bellashuvlar harbiylar o‘rtasida ham davom etyapti. “Temur tuzuklari bilimdoni” tanlovi kuch tuzilmalaridagi yosh harbiy xizmatchilarning ma’naviy saviyasi va intellektual salohiyatini yuksaltirishda muhim vazifani bajarmoqda. Avgust oyi davomida barcha hududlarda ushbu tanlovning hududiy bosqichi yakunlanib, sentabr oyida respublika bosqichi bo‘lib o‘tadi.
“Yoshlar kutubxonasi” rukni ostida chop etilayotgan kitoblar o‘qilishi shart bo‘lgan eng muhim bilim manbalari bo‘la oladi. O‘tgan yili ushbu rukn ostida 47 nomdagi 470 ming dona badiiy adabiyot chop etilib, respublikadagi barcha ta’lim muassasalarining kutubxonalariga yetkazib berilgan edi.
Joriy o‘quv yili arafasida ham an’ana davom ettirilib, yana 12 nomdagi 120 ming dona o‘zbek va jahon adabiyotining eng sara asari chop etildi. Hozirda ular mustaqillik bayrami sovg‘asi sifatida respublika bo‘ylab barcha ta’lim muassasalariga yetkazib berilmoqda.
Bundan tashqari, “Ma’rifat karvoni” loyihasi doirasida Namangan viloyatiga 25 ming, Toshkent viloyati Bo‘ka tumaniga 13 ming, Toshkent shahrining Uchtepa tumaniga 10 ming, Quyi Chirchiq tumaniga 1,5 ming kitob yetkazib berildi.
Izoh (0)