Жалолиддин Мангубердининг қабри қаерда?

Тадқиқотчилар буни ўрганиш ва буюк саркарда хокини Ўзбекистонга олиб келишга киришди. Бу ҳақда Республика Маънавият ва маърифат маркази матбуот хизмати «Дарё»га хабар берди.

Август ойида Хоразм вилоятида ўтказилган «Маънавият фестивали»да Республика Маънавият ва маърифат маркази Хоразм вилояти раҳбари Б.Абдиримов ОАВлари билан бўлган матбуот анжуманида шундай деди:

«Биз Туркия давлати билан ҳамкорликда йирик бир лойиҳани амалга ошириш арафасида турибмиз. Ўзбек элининг миллий қаҳрамони Жалолиддин Мангуберди қабрини Ўзбекистонга олиб келиш, давлатчилигимизни Туркия тарихчилари назаридаги маълумотлар юзасидан ўрганиш ишлари олиб борилмоқда. Биз ўз тарихимиз ва турк тарихчилари манбаларини омихталаган ҳолда янги тарих саҳифаларини очиш ниятидамиз. Шу орқали тарихимизни янги босқичда ўрганиш ишларини олиб бормоқдамиз. Албатта, бу лойиҳамиз миллатимизда ватанпарварлик ғояларини ўстиришда катта аҳамиятга эга бўлади».

Мазкур фикрлар иштирокчиларда алоҳида қизиқиш уйғотди. Бундан ташқари «Маънавият фестивали» доирасида ички туризмни ривожлантириш борасида «Маърифат тур»лойиҳаси, «Жамият тараққиётининг асоси — маънавиятдир» илмий-амалий конференцияси, «Йилнинг энг фаол маънавият тарғиботчиси» кўрик танловининг республика босқичи ўтказилди.