Шу кунга қадар гендер тафовут кўрсаткичлари келтирилган 150 га яқин мамлакат рўйхатига Ўзбекистон бирор марта ҳам киритилмаган. Бу ҳақда Ўзбекистон Олий Мажлиси Сенатининг XXI ялпи мажлисида сенатор Сайёра Баратова айтиб ўтди, дея хабар бермоқда «Дарё» мухбири Мусулмонбек Иброҳимов.
Ялпи мажлисда Сайёра Баратова «Хотин-қизлар ва эркаклар учун тенг ҳуқуқлар ҳамда имкониятлар кафолатлари тўғрисида»ги Ўзбекистон қонуни юзасидан ўз фикрларини билдирди.
«Қонун мамлакатимиз равнақи йўлида собитқадам бўлиш, аниқ натижага йўналтирилган мақсадли дастурларни ишлаб чиқиш ҳамда қонунда белгиланган тамойиллар асосида муҳим натижаларга эришиш имконини беради. Меҳнат муносабатларида хотин-қизлар ва эркаклар учун тенг ҳуқуқ ҳамда имкониятларни таъминлаш бўйича иш берувчининг мажбуриятлари аниқ белгилаб қўйилгани ҳам қонуннинг муҳим жиҳатларидан биридир. », — деди сенатор.
Ушбу қонун 32 моддадан иборат бўлиб:
— «гендер», «гендер статистикаси», «гендер-ҳуқуқий экспертиза», «жинсий камситиш» тушунчалари ва турлари;
— мазкур йўналишда ваколатли органларнинг вазифалари ва функциялари;
— давлат бошқарувида иштирок этишда, ишга қабул қилиш ёки ёллашда, кредитлар олишда ва тадбиркорлик билан шуғулланишда гендер тенгликни таъминлаш бўйича нормалар;
— гендер тенглик бузилишининг олдини олишга қаратилган чора-тадбирлар ҳамда жавобгарлик масалалари акс эттирилган.
Қонунда эркаклар ва аёллар учун тенг ҳуқуқлар ҳамда имкониятларни таъминлашнинг асосий принциплари белгиланган.
Эътиборли жиҳати, қонунда норматив-ҳуқуқий ҳужжатларнинг ва улар лойиҳаларининг гендер-ҳуқуқий экспертизасини ўтказишга оид алоҳида норма белгиланган.
Бу эса бугунги кунда қонун ҳужжатлари ва уларнинг лойиҳалари коррупцияга қарши экспертизадан ўтказиб келинаётгани каби гендер тенглик нуқтаи назаридан ҳам ҳуқуқий экспертизадан ўтказилишига асос бўлади.
Қонуннинг яна бир муҳим жиҳати, унда гендер статистикасини шакллантириш механизми очиб берилган. Давлат статистика органлари мазкур статистик кўрсаткичларни шакллантириш, уларни доимий янгилаб бориш учун ваколатли орган этиб белгиланган.
Қонунда хотин-қизлар ва эркаклар учун тенг ҳуқуқ ҳамда имкониятларни таъминлаш соҳасидаги Вазирлар Маҳкамаси ва Гендер тенгликни таъминлаш бўйича комиссиясининг, шунингдек, давлат органларининг ваколатлари, нодавлат нотижорат ташкилотлари ва фуқаролик жамиятининг бошқа институтлари иштироки белгиланган.
Қонунда хотин-қизлар ва эркакларни ишга қабул қилишга оид нормалар белгиланган бўлиб, уларга кўра давлат хизматидаги бўш лавозимларни, шу жумладан, раҳбар лавозимларини эгаллаш учун танлов эълон қилинади. Бунинг учун давлат органларида махсус комиссияси тузилиб, номзодлар тўғрисидаги маълумотлар ушбу комиссия томонидан кўриб чиқилади.
Изоҳ (0)