Самарқандда алимент тўламагани учун 5 марта судланган аёлга яна жиноят иши қўзғатилди
Самарқандда алимент тўлашдан муттасил бўйин товлаб келган аёлга нисбатан жиноят иши қўзғатилди, деб хабар бермоқда Zarnews.
Фуқаролик ишлари бўйича Тойлоқ туманлараро судининг суд буйруғига асосан қарздор З.Р. томонидан ундирувчи З.Т.нинг фойдасига тўрт нафар фарзандининг вояга етгунларига қадар моддий таъминоти учун ҳар ойдаги иш ҳақи ва бошқа даромадларининг иккидан бир қисми миқдорида алимент пулини тўлаб бориши белгиланган.
Қарздор З.Р. яъни болаларнинг онаси муқаддам беш маротаба Жиноят Кодексининг 122-моддаси билан судланган бўлишига қарамасдан, ўзига тегишли хулоса чиқармай, алимент пулларини тўлашдан қасддан бўйин товлаб келган.
Шу сабабли, Ургут туман маъмурий судининг қарори билан З.Р.га Маъмурий жавобгарлик тўғрисидаги кодекснинг 474-моддаси билан энг кам иш ҳақининг 20 баравари миқдорида жарима жазоси тайинланган.
Шундан сўнг ҳам фуқаро З.Р. тайинланган маъмурий жазодан ўзига тегишли хулоса чиқармасдан, вояга етмаган фарзандларини моддий таъминлашдан қасддан муттасил бўйин товлаб келган. Бугунги кунда унинг алимент тўловларидаги қарздорлиги 6 миллион 977 минг сўмни ташкил этган.
Ушбу ҳолат юзасидан Бюронинг Ургут туман бўлими томонидан фуқаро З.Р.га нисбатан Жиноят Кодексининг 122-моддаси 2-қисми билан жиноят иши қўзғатилиб, суриштирув ҳаракатлари олиб борилмоқда.
Аввалроқ Самарқандда 4 нафар фарзандига алимент тўлашдан бош тортган шахсга нисбатан жиноят иши қўзғатилган эди.
