Навоийда бемор қиз учун пластик картага йиғилган 6 миллион сўмдан ортиқ пуллар ўғирланди. Бу ҳақда Ўзбекистон Республикаси ИИВ Жамоатчилик ва ОАВ билан алоқалар бошқармаси хабарида айтилади.
2019 йил 19 июль куни Навоий шаҳрида Гулбоғ кўчасида яшовчи 48 ёшли Ж.П. исмли аёл ИИБга мурожаат қилиб, унда шу йил 3 июлдан 4 июлга қадар бўлган вақт оралиғида номаълум шахс унинг 12 ёшли қизи Г.А.нинг соғлиғини тиклаш учун моддий ёрдам кераклиги тўғрисида Telegram ижтимоий тармоғидаги «Бемор болажон» каналига берган эълони билан танишиб +99890-362-**-** телефон рақамидан Ж.П.га қўнғироқ қилиб, қизининг соғлиғини тиклаш учун ўз ҳисобидан пул маблағларини хайрия қилмоқчилигини айтиб, алдов йўли билан ишончига кирганини ва ундан пластик картаси махфий кодини олиб картасидан 6 090 300 сўм пулини ечиб олганлигини маълум қилган.
Ҳолат юзасидан жиноят иши қўзғатилиб, тергов ҳаракатлари олиб борилмоқда.
«Ҳурматли фуқаролар, агарда сизга хайрия қилиш мақсадида ёки турли интернет сайтлари орқали арзон нархдаги маҳсулотларни сотиб олишни айтиб, банк ҳисоб рақамингиз, пластик карточкангизнинг рақамларини сўраган шахсларга ҳисоб рақамларингиз ва пластик карточкангизнинг махфий кодларини тақдим қилманг! Шу каби ҳолатлар аввал ҳам юз бергани боис биз бу ҳақида сайтимиз орқали огоҳлантирган эдик. Бу албатта молиявий хавфсизлигингизнинг гаровидир», — дейилади хабарда.
Изоҳ (0)