UNESCO раҳбари Ўзбекистондаги Жаҳон мероси обидаларига ташриф буюради

UNESCO бош директори Одри Азуле август ойи охирида Ўзбекистонга илк ташриф билан келади, деб хабар бермоқда «Gazeta.uz».

Ташриф давомида у 26 август куни моддий ва номоддий маданий меросни асраш бўйича халқаро анжуманда иштирок этади. Шавкат Мирзиёев билан учрашади ҳамда Самарқанддаги «Шарқ тароналари» мусиқий фестивалини очиб беради. 27 август куни эса UNESCO раҳбари Бухорога ташриф буюради.

Бўлажак анжуманда кўплаб мамлакатларнинг туризм ва маданият вазирлари иштирок этиши кутилмоқда. Президент билан ўтказиладиган музокарада эса ҳамкорликни мустаҳкамлаш ва бой маданий меросни тиклаш масалалари муҳокама қилиниши режалаштирилган.

Ўзбекистонда UNESCO дунё мероси обидалари рўйхатидаги 962 та объектнинг 6 таси, шу жумладан, Хивадаги Ичан қалъа, Бухоро ва Шаҳрисабз тарихий марказлари, Самарқанднинг диққатга сазовор жойлари ва Ғарбий Тян-Шан жойлашган.