Ichki ishlar vaziri Po‘lat Bobojonov “O‘zbekiston 24” telekanaliga Jasliq koloniyasi tugatilishining ahamiyati haqida intervyu berdi, deb xabar bermoqda “Xalq so‘zi Online”.
O‘zbekiston Prezidenti Shavkat Mirziyoyev 2019-yil 2-avgust kuni “Qoraqalpog‘iston Respublikasi Ichki ishlar vazirligining 19-son ixtisoslashtirilgan jazoni ijro etish koloniyasini tugatish to‘g‘risida”gi (“Jasliq” qo‘rg‘onida joylashgan) qarorni imzolagan edi.
IIV rahbari Po‘lat Bobojonov 1999-yilda Qo‘ng‘irot tumanining Jasliq qo‘rg‘onida qurilgan koloniyaning yopilishi to‘g‘risidagi qaror O‘zbekistonning xalqaro obro‘siga ijobiy ta’sir ko‘rsatishini qayd etgan.
Vazir bu yerda og‘ir va o‘ta og‘ir jinoyatlar sodir qilgan va uzoq muddat ozodlikdan mahrum qilish jazosiga hukm qilingan shaxslar saqlanib kelinayotgani, ushbu koloniya nafaqat bizning fuqarolar orasida, qolaversa, xalqaro tashkilotlar orasida ham salbiy nom qozongan koloniya hisoblanishini qo‘shimcha qilgan.
“Bu koloniyani muhtaram Prezidentimiz qarori bilan tugatish nima uchun zarur bo‘lib qoldi? Birinchidan, joylashishi — Nukus shahridan 300 kilometr, Qo‘ng‘irot tuman markazidan esa 180 kilometr uzoqlikda. Ikkinchidan, iqlimini olsak, qishda qahraton sovuq, yozda jazirama issiq. Jazoni o‘tayotgan shaxslar, ularning qarindoshlari, yaqinlarining kelib-ketishlariga ham o‘ta noqulay”, — degan u.
“Siz bir tasavvur qiling, Farg‘ona viloyatidan, Andijon yoki Surxondaryo viloyatidan ota-ona yoki farzandlari bilan o‘sha yerda jazo o‘tayotgan mahkumni ko‘rish uchun kelish juda ko‘p masofa bosib, Jasliq qo‘rg‘oniga borilar edi”, — deb aytib o‘tgan Bobojonov.
O‘z navbatida ichki ishlar vaziri “Jasliq” jazoni ijro etish koloniyasida 5000 dan 10000 kishigacha, shuningdek, 5000 nafargacha diniy ekstremistlarning saqlanishi to‘g‘risidagi xabarlarni rad etdi.
“Mazkur muassasaning bugungi kundagi limiti 1100 o‘rin. Hozirgi kunda 395 nafar mahkum saqlanayapti va shularning atigi 10 foizi diniy-ekstremistik jinoyatlar uchun jinoiy javobgarlikka tortilgan shaxslardir”, — deya bunga izoh bergan u.
IIVga bir oy muddatga Jasliqda saqlanayotgan mahkumlarni sud tomonidan belgilangan tartib turiga muvofiq ravishda ichki ishlar organlarining boshqa jazoni ijro etish koloniyalariga o‘tkazish topshirilgan.
Po‘lat Bobojonov Prezidentning tegishli Farmoni bilan 2017-yildan buyon 4000 nafarga yaqin mahkum afv etilganini e’tirof etar ekan, ozod qilingan shaxslar davlat va jamiyat e’tiboridan chetda qolayotgani yo‘qligini ta’kidlagan.
Izoh (0)