Ўзбекистон Республикаси Вазирлар Маҳкамасининг 31 июлдаги фармойиши билан 2019 йилда жисмоний тарбия ва спорт объектларини қуриш, реконструкция қилиш ва капитал таъмирлаш бўйича манзилли дастури асосида 51 та объектда қурилиш-таъмирлаш ишлари амалга оширилади. Бу ҳақда Жисмоний тарбия ва спорт вазирлиги хабар берди.
Уларнинг 25 таси янги спорт иншооти сифатида қад кўтаради, 21 та мавжуд спорт мажмуасида реконструкция ва 5 та мажмуада капитал таъмирлаш ишлари амалга оширилади.
Мазкур дастур Президентнинг ҳудудларга қилган ташрифи давомида спорт иншоотларини халқаро тажрибадан фойдаланган ҳолда ва мамлакат табиий-иқлим шароитларини ҳисобга олиб бунёд этиш бўйича берган кўрсатмаларига асосан шакллантирилди. Хусусан, давлат раҳбари томонидан энергия тежамкор, енгил конструксияли, сендвич панелли кичик спорт заллари қуриш вазифаси топширилган эди.
Жорий йилда илк маротаба Жиззах вилоятининг Фориш, Самарқанд вилоятининг Нуробод, Тошкент вилоятининг Бўка, Тошкент, пойтахтнинг Учтепа, Мирзо Улуғбек туманларида енгил конструксияли сендвич паннеллари асосида янги спорт иншоотлари қурилади.
Қорақалпоғистон Республикасининг Мўйноқ, Наманган вилоятининг Чортоқ туманларида янги ёпиқ турдаги сузиш ҳавзалари бунёд этилади. Навоий вилоятининг Хатирчи, Тошкент вилоятининг Бўка туманлари ҳамда Сирдарё вилояти Гулистон шаҳридаги бассейнлар капитал таъмирланади.
2020—2024 йилларда республикада болалар ва ўсмирлар спорт мактаблари, умумтаълим мактабларида спорт объектларини қуриш, реконструкция қилиш ва капитал таъмирлаш ҳамда уларнинг моддий-техника базасини мустаҳкамлаш чора-тадбирлари тўғрисидаги тасдиқланган ҳукумат қарорига кўра, 2020—2022 йилларда республика бўйича:
болалар ва ўсмирлар спорт мактабларида жами 178 та (2020 йил 46 та, 2021 йил 52 та 2022 йил 80 та) спорт объекти қурилади, реконструкция қилинади ва капитал таъмирланади.
Умумтаълим мактабларида жами 52 та янги спорт зали қурилиб, яна 89 та мавжуд спорт зали реконструкция қилинади.
Янада кўпроқ футбол ва спорт янгиликларидан бохабар бўлишни истасангиз, «Дарё»нинг Telegram’даги расмий спорт канали — @daryo_sport’га обуна бўлинг!
Изоҳ (0)