Абдусалом Азизов: «Регламент, чемпионат формати ва жамоалар сонини ҳар йили ўзгартиришни тўхтатамиз»

Ўзбекистон футбол ассоциацияси президенти Абдусалом Азизов ташкилот раҳбарияти, бошқарма ҳамда бўлимлар раҳбарлари иштирокида ўзбек футболидаги мавжуд муаммолар ҳамда ташкилотнинг яқин келажакдаги режалари юзасидан йиғилиш ўтказди. Бу ҳақда ташкилотнинг расмий сайтида хабар қилинди.

Таъкидланишича, ташкилот раҳбари томонидан дастлаб вилоят футбол ассоциациялари тизимидаги муаммоларни бартараф этиш чоралари, ассоциацияларни моддий қўллаб-қуватлаш, кадрлар малакасини кўриб чиқиш, маҳаллий ҳокимиятлар билан биргаликда вилоятларда футболни ривожлантириш борасида кўрсатмалар берилган.

Янги президент томонидан терма жамоаларнинг иш режалари билан танишиш чоғида «Миллий» стадион майдони ҳали талаб даражасида эмаслиги ва йил охиригача ушбу стадион чимини тартибга келтириш вазифаси қўйилган. Унга қадар терма жамоалар бошқа стадионларда ҳам учрашувлар ўтказиши таъкидланган.

Бир вақтнинг ўзида Давлат хавфсизлик хизмати раиси бўлган Абдусалом Азизов келишилган ўйинлар ҳамда тотализаторга қарши курашиш борасида ҳуқуқни муҳофаза қилиш органлари билан яқиндан ҳамкорлик қилган ҳолда, бу нопок йўл билан ўзбек футболини орқага тортаётганлар, мухлисларнинг қизиқишини сўндираётганлар аниқланиши ва тегишли жазога тортилишини қайд этган.

Абдусалом Азизов болалар футболидаги аҳволни яхшилаш, улар учун мунтазам мусобақалар ташкил этиш, ўсмир ва ёшларнинг профессионал футболга ўтиш жараёнидаги муаммолар, уларнинг профессионал футболчи сифатида шаклланиши, миллий терма жамоага муносиб футболчи бўлиб етишишида тўсиқ бўлаётган камчиликларни бартараф этиш кераклиги айтиб ўтган.

У, шунингдек, миллий чемпионатдаги тартиб-интизомни кучайтириш зарурлигини ҳам алоҳида таъкидлаган:

Ҳозирда жамоаларда мураббий ва футболчилар шартномалари борасида ноаниқликлар учраб туришидан хабарим бор. Қисқа муддатли шартномалар ўрнини икки томоннинг мажбуриятлари тўлиқ акс этган профессионал шартномалар эгаллаши керак. Шунда мураббийлар ҳам маълум муддат ўз жамоаси билан ишлаб, уни кучайтириш ҳақида ўйлайди. Футболчилар ҳам бир йил ўтар-ўтмасдан ўзига бошқа клуб қидиришга тушмайди. Регламент, чемпионат формати ва жамоалар сонини ҳар йили ўзгартиришни тўхтатамиз. Кейинги мавсумда ҳам жамоалар сони шунчалигича қолади ва Суперлигага чиқадиган жамоа спорт принциплари асосда курашиб йўлланмага эга чиқсин. Турли аралашувлар орқали жамоаларни юқори лигаларга олиб чиқишга бўлган уринишларга йўл қўйилмайди.

Абдусалом Азизов, Ўзбекистон футбол ассоциацияси президенти