Ватиканда криминалистика бўйича экспертлар 1983 йилда бедарак йўқолган 15 ёшли Эмануэла Орландининг иши бўйича Тевтон қабристони яқинида жойлашган иккита хилхонани очди, деб хабар беради Tengrinews.
Йўқолган қизалоқнинг оиласи номидан иш юритувчи генетик Жоржио Портернинг маълум қилишича, хилхонадан катта ва ёш болаларнинг мингдан ортиқ суяклари топилган.
«Биз бу қадар кўп суякка дуч келамиз деб ўйламаган эдик. Бугун топилган минглаб суяклар ўнлаб инсонларга тегишли. Биз суяклар нима сабабдан бу ерда пайдо бўлиб қолганини аниқлашни истаймиз», — дейди олим.
Топилган суякларнинг барчаси экспертизага жўнатилган, унинг натижаси ҳозирча номаълум.
«Орланди иши» замонавий Ватиканга боғлиқ тарихдаги энг сирли ишлардан бири ҳисобланади. 15 ёшли Эмануэла Орланди Ватикан полициячисининг қизи бўлган. 1983 йилнинг 22 июнида қизалоқ Римда бедарак йўқолган. Уни охирги марта мусиқа дарсига кетаётганида кўришган. Йўқолиб қолганидан сўнг қизалоқ сингилларидан бирига қўнғироқ қилиб, кутилмаганда косметика рекламаси бўйича фойдали таклиф олганини билдирган.
2018 йилнинг октябрида Ватикан элчихонаси биносида олиб борилган қурилиш ишларида бир неча одамнинг суяклари топилган. Бироқ буларнинг «Орланди иши»га ҳеч қандай алоқаси йўқлиги аниқланган.
2019 йилнинг мартида Орланди оиласига аноним хат келиб тушган. Унда Тевтон қабристонидаги фаришта кўринишидаги ҳайкалнинг сурати бўлган. Йўқолган қизалоқнинг акаси суддан хатда кўрсатилган қабрни очиш бўйича рухсат олган, бироқ у ердан ҳеч нима топилмаган.
Изоҳ (0)