Vatikanda kriminalistika bo‘yicha ekspertlar 1983-yilda bedarak yo‘qolgan 15 yoshli Emanuela Orlandining ishi bo‘yicha Tevton qabristoni yaqinida joylashgan ikkita xilxonani ochdi, deb xabar beradi Tengrinews.
Yo‘qolgan qizaloqning oilasi nomidan ish yurituvchi genetik Jorjio Porterning ma’lum qilishicha, xilxonadan katta va yosh bolalarning mingdan ortiq suyaklari topilgan.
“Biz bu qadar ko‘p suyakka duch kelamiz deb o‘ylamagan edik. Bugun topilgan minglab suyaklar o‘nlab insonlarga tegishli. Biz suyaklar nima sababdan bu yerda paydo bo‘lib qolganini aniqlashni istaymiz”, — deydi olim.
Topilgan suyaklarning barchasi ekspertizaga jo‘natilgan, uning natijasi hozircha noma’lum.
“Orlandi ishi” zamonaviy Vatikanga bog‘liq tarixdagi eng sirli ishlardan biri hisoblanadi. 15 yoshli Emanuela Orlandi Vatikan politsiyachisining qizi bo‘lgan. 1983-yilning 22-iyunida qizaloq Rimda bedarak yo‘qolgan. Uni oxirgi marta musiqa darsiga ketayotganida ko‘rishgan. Yo‘qolib qolganidan so‘ng qizaloq singillaridan biriga qo‘ng‘iroq qilib, kutilmaganda kosmetika reklamasi bo‘yicha foydali taklif olganini bildirgan.
2018-yilning oktabrida Vatikan elchixonasi binosida olib borilgan qurilish ishlarida bir necha odamning suyaklari topilgan. Biroq bularning “Orlandi ishi”ga hech qanday aloqasi yo‘qligi aniqlangan.
2019-yilning martida Orlandi oilasiga anonim xat kelib tushgan. Unda Tevton qabristonidagi farishta ko‘rinishidagi haykalning surati bo‘lgan. Yo‘qolgan qizaloqning akasi suddan xatda ko‘rsatilgan qabrni ochish bo‘yicha ruxsat olgan, biroq u yerdan hech nima topilmagan.
Izoh (0)