Бугун, 23 июль куни Шайх Муҳаммад Содиқ Муҳаммад Юсуф мажмуаси мажлислар залида «Ҳаж — 2019» мавсуми олдидан ОАВ учун брифинг ташкил этилди, бу ҳақда ЎзА хабар қилади.
Унда Вазирлар Маҳкамаси ҳузуридаги Дин ишлари бўйича қўмита раиси ўринбосари Нуриймон Абулҳасан «Ҳаж — 2019» мавсуми ҳақида батафсил маълумот берди.
Бир неча йилдирки, Ҳаж ва Умра тадбирларининг ташкилий ишлари Ўзбекистон Республикаси Президентининг тавсиялари, Вазирлар Маҳкамасининг қарорлари ҳамда «Ҳаж» ва «Умра» тадбирларини ташкил этиш, ўтказиш масалалари бўйича Жамоатчилик кенгаши қарор ва таклифлари асосида юқори савияда ташкил этилмоқда.
2016 йилда 5 минг нафар зиёратчи Ҳаж сафарига борган бўлса, 2017 йилдан буён уларнинг сони 2 минг нафарга кўпайиб, умумий кўрсаткич 7 мингга етди. Бу йил ҳам худди шунча мўмин-мусулмон юртдошим Ҳаж ибодатини адо этиши кутилмоқда.
Ўтган йиллардан фарқли равишда бу йил ҳожилар сафар олдидан Ўзбекистонда бўлиб турган пайтларидаёқ ўзларини ҳам маънан, ҳам руҳан тайёрлаб, улуғ сафарга муносиб бўлиш мақсадида ижтимоий кўмакка муҳтож шахслар, кам таъминланган оилалар ва аҳоли учун хайрия ёрдами сифатида ўз ташаббуслари билан 9 миллиард сўмдан зиёд моддий ёрдам кўрсатди.
Энг муҳими, ҳожилик мақомига эришадиган инсон дин-у диёнатни яхши тушунадиган, маҳалла-кўйга ёрдам кўрсатадиган, оиласи тинч, ҳар томонлама муносиб шахс бўлишига эътибор қаратилди.
Бу йилги зиёратчиларга юқори даражада хизмат кўрсатишни таъминлаш, ҳаж ибодати билан боғлиқ амалларни тартибли адо этишни йўлга қўйиш мақсадида гуруҳ раҳбарлари ва зиёратчилар учун сафаролди ўқувлари ташкил этилди.
Жорий йилдан эътиборан Саудия Арабистонида барча турдаги хизматларга 5 фоизлик қўшимча қиймат солиғи ва меҳмонхоналарга яна 2,5 фоизлик солиқ киритилди. Бу, ўз навбатида, хизмат кўрсатиш нархлари ошишига сабаб бўлади. Лекин ўзбекистонлик ҳар бир зиёратчи учун белгилаган хизматлар нархи оширилиши ўрнига, сезиларли даражада туширилди.
Президент ташаббуси билан Ҳаж мавсуми учун сарф-харажатлар сметаси бўйича ҳар бир зиёратчидан олинадиган маблағ 33 миллион 300 минг сўм этиб белгиланди. Яъни нарх 5 миллион сўмга арзонлаштирилди.
Бу тараққиётнинг янги даврида давлат раҳбари томонидан ислом дини арконларини адо этиш учун улкан шарт-шароитлар яратиб берилаётгани ва халқга бўлган ғамхўрликнинг ёрқин намунасидир.
Яна бир муҳим янгилик, бу йил ўзбекистонлик зиёратчилар Мадина шаҳрида биринчи маротаба «Масжид ан-Набавий»дан 50 метр узоқликда жойлашган беш юлдузли «Пулман замзам» меҳмонхонасига жойлашади. Макка шаҳрида эса Ҳарамдан узоқ бўлмаган тўрт юлдузли «Аброж ал-Ҳидоя» меҳмонхонасида истиқомат қилади. Ҳожилар учун 24 соат давомида замонавий автобуслар бепул хизмат кўрсатади.
Ўзбекистон ҳожилари жорий йилнинг 24 июль — 3 август кунлари Тошкент—Мадина, Бухоро—Мадина, Самарқанд—Мадина, Қарши—Мадина, Урганч—Мадина, Наманган—Мадина Нукус—Мадина йўналишларида ҳаж сафарига кузатилади. Ҳожилар 17 август — 1-сентябр кунлари мамлакатга қайтиб келиши режалаштирилган.
Изоҳ (0)