ИИВ ҳузуридаги Жазони ижро этиш бош бошқармаси бўлими бошлиғи Баҳодир Юсупов маҳкума Гулнора Каримова ўз ҳуқуқларидан фойдаланиб келаётганини таъкидлади. Бу ҳақда 17 июль куни ИИВ ҳузуридаги Жазони ижро этиш бош бошқармаси (ЖИЭББ) вакиллари журналистлар билан бўлиб ўтган очиқ мулоқотда айтиб ўтди, дея хабар бермоқда «Дарё» мухбири Мусулмонбек Иброҳимов.

Фото: Ахборот ва оммавий коммуникациялар агентлиги

Анжуманда ЖИЭББ Даволаш профилактика ёрдамини ташкиллаштириш бўлими бошлиғи Баҳодир Юсупов маҳкума Гулнора Каримова Ўзбекистон Жиноят-ижроия кодексининг бир нечта моддаларида назарда тутилган ҳуқуқлардан фойдаланиб келаётганини маълум қилди.

«Ўзбекистон Жиноят-ижроия кодексининг 78-моддасига биноан маҳкума Гулнора Каримова посилкалар, йўқловлар, бандероллар ва пул жўнатмалари олиш ва юбориш ҳуқуқидан фойдаланган ва фойдаланиб келмоқда. Жумладан, Каримова 2019 йилнинг 2–3, 10 апрель, 10 июнь ва 13–15 июль кунлари унга тегишли йўқловлар ҳамда бандеролларни қабул қилган», — деди Баҳодир Юсупов.

Жазони ижро этиш бош бошқармаси вакилининг қўшимча қилишича, Гулнора Каримова маҳкумнинг узоқ муддатли учрашуви ҳуқуқидан ҳам фойдаланиб келмоқда.

«Гулнора Каримова Ўзбекистон Жиноят-ижроия кодексининг 76-моддасига мувофиқ маҳкумнинг учрашув ҳуқуқидан фойдаланмоқда ва фойдаланишда давом этмоқда. Хусусан, Каримова 2019 йилнинг 12–15 апрель ҳамда 7–10 июнь кунлари оралиғида оила аъзолари билан узоқ муддатли учрашувда бўлган. Узоқ муддатли учрашув қонунчилигимизда 3 сутка қилиб белгиланган. Бу ҳуқуқдан Каримова тўлақонли фойдаланган ва фойдаланиб келмоқда», — деди Юсупов.

Олдинроқ, ИИВ ҳузуридаги Жазони ижро этиш бош бошқармаси Гулнора Каримова 2017 йил декабрь ойида Соғлиқни сақлаш вазирлиги суд-тиббий экспертизасидан ўтказилганда унда маълум бир сурункали касалликлар аниқланганини маълум қилган эди.